మద్దిలేటి సార్‌కు ఘన సత్కారం..

బనగానపల్లె పట్టణంలో రిటైర్డ్ హెచ్ఎం భరతం మద్దిలేటి సార్ 89వ పుట్టినరోజు వేడుకలు ఆత్మీయులు, శ్రేయోభిలాషుల మధ్య ఘనంగా నిర్వహించారు. బనగానపల్లె పట్టణ మాజీ సర్పంచ్ బిసి రాజారెడ్డి ఆధ్వర్యంలో జరిగిన ఈ వేడుకల్లో పలువురు ప్రముఖులు పాల్గొని మద్దిలేటి సార్‌కు జన్మదిన శుభాకాంక్షలు తెలిపారు. ఈ సందర్భంగా బిసి రాజారెడ్డి మాట్లాడుతూ మద్దిలేటి సార్‌తో తనకు, తన కుటుంబ సభ్యులకు గత 50 ఏళ్లుగా ఆత్మీయ అనుబంధం కొనసాగుతోందని గుర్తు చేసుకున్నారు.

మద్దిలేటి సార్ సంపూర్ణ ఆరోగ్యంతో 88 ఏళ్లు పూర్తి చేసుకుని 89వ సంవత్సరంలోకి అడుగుపెట్టడం ఎంతో సంతోషకరమైన విషయమని బిసి రాజారెడ్డి పేర్కొన్నారు. ఆయనకు శాలువా కప్పి, పూలమాలతో సత్కరించి, మిఠాయిలు తినిపించి శుభాకాంక్షలు తెలియజేశారు. జీవితాంతం క్రమశిక్షణ, నిబద్ధతతో పనిచేసిన మద్దిలేటి సార్ సేవలను కొనియాడారు.

ఉపాధ్యాయ వృత్తిలో మద్దిలేటి సార్ ప్రత్యేక గుర్తింపు పొందారని బిసి రాజారెడ్డి తెలిపారు. ఆయన వద్ద విద్యాభ్యాసం చేసిన ఎంతోమంది విద్యార్థులు ప్రస్తుతం ప్రభుత్వ ఉద్యోగాలు, వ్యాపార, రాజకీయ రంగాల్లో ఉన్నత స్థానాల్లో స్థిరపడ్డారని చెప్పారు. విద్యార్థులకు కేవలం పాఠ్యాంశాలనే కాకుండా క్రమశిక్షణ, సంస్కారం, గురువులు, పెద్దల పట్ల గౌరవం వంటి విలువలను కూడా నేర్పించారని కొనియాడారు.

తాను పనిచేసిన పాఠశాలల అభివృద్ధికి మద్దిలేటి సార్ ఎంతో కృషి చేశారని బిసి రాజారెడ్డి తెలిపారు. ఉపాధ్యాయ వృత్తికి గౌరవం పెంచేలా తన బాధ్యతలను అంకితభావంతో నిర్వహించారని అన్నారు. ఉద్యోగ జీవితంలో ఎలాంటి మచ్చ లేకుండా సేవలందించి అందరి ప్రశంసలు పొందారని పేర్కొన్నారు.

1996లో హెచ్ఎం పదవి నుంచి పదవీ విరమణ చేసిన తర్వాత కూడా మద్దిలేటి సార్ తన శేష జీవితాన్ని ఆనందంగా గడుపుతూ అందరికీ సలహాలు, సూచనలు అందిస్తున్నారని బిసి రాజారెడ్డి తెలిపారు. ఆత్మీయులు, స్నేహితులతో ఎల్లప్పుడూ సన్నిహితంగా ఉంటూ అందరివాడిగా గుర్తింపు పొందారని అన్నారు. భగవంతుడి ఆశీస్సులతో ఆయన వందేళ్లు సంపూర్ణ ఆరోగ్యంతో జీవించాలని ఆకాంక్షించారు.

బనగానపల్లెకు చెందిన ప్రముఖ వైద్యులు డాక్టర్ విజయ్ కుమార్ మాట్లాడుతూ మద్దిలేటి సార్‌కు అన్ని రంగాల్లో మంచి స్నేహితులు ఉన్నారని తెలిపారు. 88 ఏళ్ల పాటు ఆరోగ్యంగా, సంతోషంగా జీవించడం ఆయన అదృష్టమని అన్నారు. భవిష్యత్తులో కూడా ఆయన ఆరోగ్యంగా ఉండాలని కోరుకున్నారు.

రిటైర్డ్ హెచ్ఎం ఐఎన్ పక్కిరారెడ్డి మాట్లాడుతూ మద్దిలేటి సార్‌తో తనకున్న స్నేహానుబంధాన్ని గుర్తు చేసుకున్నారు. వృత్తిపరంగా కలిసి పనిచేసిన రోజులను జ్ఞాపకం చేసుకున్నారు. ఏదైనా అంశంపై చర్చ సమయంలో అభిప్రాయ భేదాలు వచ్చినా, సాయంత్రానికి అన్నీ మర్చిపోయి స్నేహంగా కలిసిపోయేవారమని తెలిపారు.

ఈ పుట్టినరోజు వేడుకల్లో బాల తిమ్మారెడ్డి, శంకరయ్య, ఇస్మాయిల్ ఖాన్, గుండం నాగేశ్వర్ రెడ్డి, విష్ణువర్ధన్ రెడ్డి, టీఎన్ఆర్ రెడ్డి, హరి తదితరులు పాల్గొన్నారు. మద్దిలేటి సార్ సేవలను, వ్యక్తిత్వాన్ని పలువురు ప్రశంసిస్తూ ఆయనకు దీర్ఘాయుష్షు కలగాలని ఆకాంక్షించారు.