ఎన్టీఆర్ భరోసా పింఛన్ల పంపిణీలో ఎమ్మెల్యే బొండా ఉమా

విజయవాడ సెంట్రల్ నియోజకవర్గంలో ఎన్టీఆర్ భరోసా పింఛన్ల పంపిణీ కార్యక్రమం నిర్వహించారు. 36వ డివిజన్ రామకోటి మైదానం, కుసుమ హరినాథ్ గుడి వద్ద, అలాగే 33వ డివిజన్ సత్యనారాయణపురం ప్రాంతాల్లో జరిగిన కార్యక్రమాల్లో ప్రభుత్వ విప్, సెంట్రల్ నియోజకవర్గ శాసనసభ్యుడు బొండా ఉమామహేశ్వరరావు పాల్గొన్నారు. ఈ సందర్భంగా అర్హులైన వృద్ధులు, వికలాంగులు, వితంతు మహిళలకు పింఛన్లను అందజేశారు.

ఈ సందర్భంగా ఎమ్మెల్యే బొండా ఉమ మాట్లాడుతూ, 2024 ఎన్నికల్లో తెలుగుదేశం పార్టీ నేతృత్వంలోని కూటమి ప్రభుత్వం అధికారంలోకి వచ్చిన తర్వాత ముఖ్యమంత్రి నారా చంద్రబాబు నాయుడు నాయకత్వంలో రాష్ట్రంలో సంక్షేమం, అభివృద్ధి సమన్వయంతో కొనసాగుతున్నాయని తెలిపారు. ప్రజలకు ఇచ్చిన హామీలను నెరవేర్చే దిశగా ప్రభుత్వం పనిచేస్తోందని పేర్కొన్నారు.

ప్రతి నెల 1వ తేదీ ఉదయం నుంచే వృద్ధులు, వితంతువులు, వికలాంగులకు సామాజిక భద్రతా పింఛన్లను ఇంటి వద్దకే అందిస్తూ దేశంలోనే ఆదర్శంగా నిలిచామని బొండా ఉమ అన్నారు. ఎన్నికల హామీ మేరకు వృద్ధులు, వితంతువుల పింఛన్లను రూ.4,000కు, వికలాంగుల పింఛన్లను రూ.6,000కు పెంచి అందిస్తున్నామని తెలిపారు.

మహిళల సంక్షేమం కోసం ఉచిత గ్యాస్ సిలిండర్లు, విద్యార్థుల కోసం తల్లికి వందనం పథకం, మహిళలకు ఉచిత బస్సు ప్రయాణం, అన్నా క్యాంటీన్ల పునరుద్ధరణ వంటి అనేక కార్యక్రమాలను ప్రభుత్వం అమలు చేస్తోందని పేర్కొన్నారు. సంక్షేమ పథకాలతో పాటు నియోజకవర్గ అభివృద్ధికి కూడా ప్రభుత్వం సమాన ప్రాధాన్యత ఇస్తోందని తెలిపారు.

ప్రస్తుతం కొనసాగుతున్న ఇంటింటికి తెలుగుదేశం కార్యక్రమానికి ప్రజల నుంచి విశేష స్పందన లభిస్తోందని ఎమ్మెల్యే ఉమ అన్నారు. కూటమి ప్రభుత్వ రెండేళ్ల పాలనపై ప్రజలు సంతృప్తి వ్యక్తం చేస్తున్నారని తెలిపారు. భవిష్యత్తులో కూడా పారదర్శకమైన, ప్రజా సంక్షేమ పాలనను కొనసాగిస్తూ ప్రజల ఆశీర్వాదాలతో మరింత కష్టపడి పనిచేస్తామని వెల్లడించారు.

ఈ కార్యక్రమంలో నియోజకవర్గ కోఆర్డినేటర్ నవనీతం సాంబశివరావు, మాజీ కార్పొరేటర్ ముప్పొ వెంకటేశ్వరరావు, డివిజన్ నాయకులు, పార్టీ కార్యకర్తలు, ప్రజాప్రతినిధులు పాల్గొన్నారు. ప్రజల సంక్షేమం కోసం నిరంతరం పనిచేస్తూ వారి నమ్మకాన్ని నిలబెట్టుకుంటామని నాయకులు తెలిపారు.