సీబీఎస్ఈ కీలక నిర్ణయం.. మూడో భాషలో ఉత్తీర్ణత తప్పనిసరి

కేంద్ర మాధ్యమిక విద్యా మండలి సీబీఎస్ఈ పదో తరగతి విద్యార్థులకు సంబంధించిన మూడో భాష బోధన, మూల్యాంకన విధానంపై కీలక స్పష్టత ఇచ్చింది. జాతీయ విద్యా విధానం అమలు దిశగా చేపడుతున్న మార్పుల్లో భాగంగా, 2027–28 విద్యా సంవత్సరం నుంచి పదో తరగతిలో ప్రవేశించే విద్యార్థులకు మూడో భాషకు సంబంధించిన బోర్డు పరీక్ష ఉండదని సీబీఎస్ఈ తాజాగా విడుదల చేసిన సర్క్యులర్‌లో పేర్కొంది. అయితే, బోర్డు పరీక్ష లేకపోయినా విద్యార్థులు మూడో భాషకు సంబంధించిన పాఠశాల ఆధారిత మూల్యాంకనంలో తప్పనిసరిగా ఉత్తీర్ణత సాధించాలని స్పష్టం చేసింది. ఈ మూల్యాంకనంలో ఉత్తీర్ణత సాధించిన విద్యార్థులకే పదో తరగతి సెకండరీ స్కూల్ ఎగ్జామినేషన్ పాస్ సర్టిఫికెట్ జారీ చేయబడుతుందని వెల్లడించింది. ఈ నిర్ణయం విద్యార్థులు, తల్లిదండ్రులు, ఉపాధ్యాయులు మరియు పాఠశాలల దృష్టిలో అత్యంత ప్రాధాన్యం సంతరించుకుంది. ఇప్పటివరకు మూడో భాష భవిష్యత్తులో ఎలా పరిగణించబడుతుందనే విషయంలో అనేక సందేహాలు వ్యక్తమయ్యాయి. బోర్డు పరీక్ష లేకపోతే ఆ భాషకు ప్రాధాన్యం తగ్గుతుందా అనే చర్చ కూడా సాగింది. అయితే తాజా సర్క్యులర్‌తో సీబీఎస్ఈ ఆ సందేహాలకు తెరదించింది. బోర్డు పరీక్ష నిర్వహించకపోయినా, మూడో భాషలో కనీస అర్హత సాధించడం మాత్రం తప్పనిసరి అని స్పష్టం చేసింది. జాతీయ విద్యా విధానం బహుభాషా అభ్యాసానికి పెద్దపీట వేస్తోంది. విద్యార్థులు ఒకే భాషకు పరిమితం కాకుండా పలు భారతీయ భాషలను నేర్చుకోవడం ద్వారా వారి భాషా నైపుణ్యాలు, సంభాషణా సామర్థ్యం, సాంస్కృతిక అవగాహన మరింత పెరుగుతుందని విద్యా నిపుణులు భావిస్తున్నారు. ఈ నేపథ్యంలో మూడో భాషకు బోర్డు పరీక్ష లేకపోయినా, పాఠశాల స్థాయిలో సమగ్ర మూల్యాంకనం నిర్వహించడం ద్వారా విద్యార్థులు ఆ భాషను నిర్లక్ష్యం చేయకుండా చూడాలన్న ఉద్దేశంతో సీబీఎస్ఈ ఈ నిర్ణయం తీసుకున్నట్లు భావిస్తున్నారు.