చైనా నిఘా వ్యవస్థపై సంచలన కథనం..

చైనా ప్రపంచవ్యాప్తంగా భారీ స్థాయిలో నిఘా వ్యవస్థను నిర్వహిస్తున్నట్లు అమెరికాకు చెందిన ఓ పత్రిక ప్రచురించిన సంచలన కథనం వెల్లడించింది. చైనా ప్రభుత్వం తన సొంత పౌరులతో పాటు ఆ దేశానికి వచ్చే విదేశీయులపై కూడా విస్తృత స్థాయిలో పర్యవేక్షణ కొనసాగిస్తున్నట్లు కథనం పేర్కొంది. సుమారు 140 కోట్లకు పైగా ప్రజలపై నిఘా కొనసాగుతోందని, ఆధునిక సాంకేతిక పరిజ్ఞానం, కెమెరాలు, మొబైల్‌ సిగ్నల్స్‌ వంటి మార్గాల ద్వారా సమాచారాన్ని సేకరిస్తున్నట్లు వివరించింది.

అంతర్జాతీయ మీడియా కథనాల ప్రకారం, చైనా నిఘా వ్యవస్థపై పరిశోధన చేస్తున్న సైబర్‌ సెక్యూరిటీ నిపుణుడు మార్క్‌ హోఫర్‌ ఒక ఆసక్తికర విషయాన్ని గుర్తించారు. జనవరిలో చైనా తన పౌరులపై ఎలా నిఘా పెడుతుందో తెలుసుకునేందుకు ఇంటర్నెట్‌లో పరిశోధన చేస్తున్న సమయంలో ‘డైనమిక్ కంట్రోల్ ప్లాట్‌ఫామ్ ఫర్ ఓవర్సీస్ పర్సనల్’ అనే వెబ్‌సైట్‌లో తన వ్యక్తిగత వివరాలు కనిపించడంతో ఆయన ఆశ్చర్యానికి గురయ్యారు.

ఆ వెబ్‌సైట్‌లో తన పేరు, ఫొటో, పాస్‌పోర్ట్‌ నంబర్‌, గతంలో చైనా పర్యటన సందర్భంగా ఉపయోగించిన మొబైల్‌ నంబర్‌ వంటి వ్యక్తిగత సమాచారం ఉన్నట్లు మార్క్‌ హోఫర్‌ గుర్తించినట్లు కథనం తెలిపింది. తనకు సంబంధించిన సమాచారం ఎలా అక్కడికి చేరిందనే విషయంపై ఆయన పరిశీలన ప్రారంభించడంతో చైనా విదేశీయులపై కొనసాగిస్తున్న నిఘా వ్యవస్థకు సంబంధించిన పలు వివరాలు వెలుగులోకి వచ్చినట్లు పేర్కొంది.

ముఖ్యంగా చైనాలోని జాంగ్‌జియాకోవు నగరానికి వచ్చిన విదేశీయుల వివరాలు ఈ వెబ్‌సైట్‌లో ఎక్కువగా ఉన్నట్లు గుర్తించారు. భారత్‌, పాకిస్థాన్‌, తైవాన్‌, ఆస్ట్రేలియా, కెనడా, న్యూజిలాండ్‌, బ్రిటన్‌, అమెరికా, ఈజిప్ట్‌, ఇరాన్‌, ఇజ్రాయెల్‌, మొరాకో, సూడాన్‌ వంటి దేశాలకు చెందిన పౌరుల సమాచారం అందులో ఉన్నట్లు వెల్లడైంది.

జాంగ్‌జియాకోవు హెబే నార్త్ యూనివర్సిటీలో చదువుతున్న విదేశీ విద్యార్థుల వివరాలు కూడా ఈ డేటాలో ఉన్నట్లు సమాచారం. ముఖ్యంగా భారత్‌, పాకిస్థాన్‌కు చెందిన విద్యార్థుల సంఖ్య ఎక్కువగా ఉన్నట్లు కథనాలు పేర్కొన్నాయి. కేవలం వ్యక్తిగత వివరాలు మాత్రమే కాకుండా, వారు ఎక్కడికి వెళ్తున్నారు, ఎలాంటి కార్యకలాపాలు నిర్వహిస్తున్నారు వంటి సమాచారం కూడా నమోదు చేసినట్లు వెల్లడైంది.

చైనా అధికారులు కెమెరా నిఘా వ్యవస్థలు, మొబైల్‌ ఫోన్‌ సిగ్నల్స్‌ ఆధారంగా విదేశీయుల కదలికలను కూడా పర్యవేక్షిస్తున్నట్లు కథనం పేర్కొంది. కొంతమంది వ్యక్తులు చైనా నుంచి తమ స్వదేశాలకు వెళ్లిన తర్వాత కూడా వారి కదలికలపై సమాచారం కొనసాగినట్లు వెల్లడించింది. దీంతో చైనా నిఘా వ్యవస్థ దేశ సరిహద్దులను దాటి పనిచేస్తోందా అనే చర్చ మొదలైంది.

చైనాలోని పోలీసు విభాగాలకు రోబోటిక్స్‌, నిఘా పరికరాలను సరఫరా చేసే ‘ఆరిజిన్ డైనమిక్’ అనే సంస్థకు ఈ వెబ్‌సైట్‌తో సంబంధాలు ఉన్నట్లు కథనంలో పేర్కొన్నారు. ఈ డేటా అక్కడి పోలీసు వ్యవస్థలకు అందుబాటులో ఉందని, ప్రజల ప్రయాణ వివరాలు, విమానాలు, రైళ్లలో ప్రయాణించిన సమాచారం, సీటు నంబర్ల వంటి వివరాలు కూడా అందులో ఉన్నట్లు వెల్లడించారు.

2019లో హాంకాంగ్‌లో జరిగిన భారీ ప్రభుత్వ వ్యతిరేక నిరసనల తర్వాత చైనా తన నిఘా వ్యవస్థను మరింత విస్తరించినట్లు కథనం తెలిపింది. దేశ పౌరులతో పాటు విదేశీయులు, విదేశీ భాగస్వాములపై కూడా ప్రత్యేక పర్యవేక్షణ కొనసాగిస్తున్నట్లు పేర్కొంది.

అయితే ఈ వెబ్‌సైట్‌లో ఉన్న సమాచారం మే నెలలో అకస్మాత్తుగా తొలగించబడినట్లు తెలుస్తోంది. అంతకుముందే సైబర్‌ సెక్యూరిటీ పరిశోధకుడు మార్క్‌ హోఫర్‌ ఆ డేటాను భద్రపరచడంతో ఈ వివరాలు వెలుగులోకి వచ్చినట్లు సమాచారం. ఈ ఆరోపణలు, కథనాలపై చైనా ప్రభుత్వం ఇప్పటివరకు ఎలాంటి అధికారిక స్పందన ఇవ్వలేదు.

ఈ పరిణామాలు ప్రపంచవ్యాప్తంగా వ్యక్తిగత గోప్యత, డిజిటల్‌ భద్రత, ప్రభుత్వ నిఘా వ్యవస్థలపై కొత్త చర్చకు దారితీశాయి. ఆధునిక సాంకేతికతను ఉపయోగించి ప్రభుత్వాలు పౌరుల సమాచారాన్ని ఎలా సేకరిస్తున్నాయి, దాని పరిమితులు ఏమిటనే అంశాలపై అంతర్జాతీయ స్థాయిలో చర్చ కొనసాగుతోంది.