చింతూరులో ఘోర రోడ్డు ప్రమాదం..

పోలవరం జిల్లాలోని విజయవాడ–జగదల్‌పూర్ జాతీయ రహదారిపై శుక్రవారం రాత్రి ఘోర రోడ్డు ప్రమాదం చోటుచేసుకుంది. చింతూరు మండలం బొడ్డుగూడెం, ఏడుగురాళ్లపల్లి గ్రామాల మధ్య మూలమలుపు వద్ద ఒడిశా నుంచి చెన్నైకి ఇనుప లోడుతో వెళ్తున్న లారీని భద్రాచలం నుంచి చింతూరు వైపు వస్తున్న కారు బలంగా ఢీకొట్టింది. ప్రమాద తీవ్రతకు లారీ కారును సుమారు వంద మీటర్ల దూరం ఈడ్చుకెళ్లింది. ఈ ఘటనలో కారులో ప్రయాణిస్తున్న ఇద్దరు వ్యక్తులు ప్రాణాలు కోల్పోయారు.

కారు నడుపుతున్న నిమ్మకాయల అయ్యన్నకు తీవ్ర గాయాలు కావడంతో ఢీకొన్న సమయంలోనే వాహనం నుంచి బయటకు పడిపోయారు. కారులో ఉన్న అవిడి సూర్యవినయతేజ మాత్రం లోపలే చిక్కుకుపోయారు. ప్రమాదాన్ని గమనించిన రహదారిపై ప్రయాణిస్తున్నవారు వెంటనే సహాయక చర్యలు చేపట్టేందుకు ప్రయత్నించారు. అయితే అదే సమయంలో కారులో ఒక్కసారిగా మంటలు చెలరేగాయి. క్షణాల్లోనే మంటలు మొత్తం కారును కమ్మేయడంతో లోపల చిక్కుకున్న సూర్యవినయతేజను బయటకు తీసుకురావడం సాధ్యం కాలేదు. దీంతో ఆయన కారులోనే సజీవదహనమయ్యారు.

తీవ్ర గాయాలతో బయటపడిన నిమ్మకాయల అయ్యన్నను స్థానికులు ఏడుగురాళ్లపల్లి ప్రాథమిక ఆరోగ్య కేంద్రానికి తరలించారు. అయితే అప్పటికే ఆయన మృతిచెందినట్లు వైద్యులు నిర్ధారించారు. ప్రమాద సమాచారం అందుకున్న చింతూరు సీఐ గోపాలకృష్ణ, ఎస్సై సంతోష్‌కుమార్ వెంటనే సంఘటనా స్థలానికి చేరుకున్నారు. ప్రమాదానికి దారితీసిన పరిస్థితులను పరిశీలించి వివరాలు సేకరించారు. కూనవరం అగ్నిమాపక కేంద్రం సిబ్బంది సంఘటనా స్థలానికి చేరుకుని కారులో చెలరేగిన మంటలను అదుపులోకి తీసుకువచ్చారు.

ప్రమాదానికి గురైన కారు నంబరు టీఎస్‌08జీఈ9755గా పోలీసులు గుర్తించారు. వాహన రిజిస్ట్రేషన్ వివరాల ఆధారంగా పోలీసులు దర్యాప్తు ప్రారంభించారు. రిజిస్ట్రేషన్‌లో ఉన్న సెల్‌ఫోన్ నంబర్‌కు పోలీసులు ఫోన్ చేయగా, ఆ వాహనాన్ని తాము గతంలోనే విక్రయించినట్లు అవతలి వ్యక్తులు తెలిపారు. దీంతో కారు ప్రస్తుతం ఎవరి ఆధీనంలో ఉందనే అంశంపై పోలీసులు మరింత విచారణ చేపట్టారు. ప్రమాదానికి ముందు కారులో ఎంతమంది ఉన్నారు, వారు ఎక్కడి నుంచి ఎక్కడికి వెళ్తున్నారు, ప్రమాదానికి అసలు కారణం ఏమిటనే వివరాలను పోలీసులు సేకరిస్తున్నారు.

మృతుల్లో అవిడి సూర్యవినయతేజ రంగారెడ్డి జిల్లా మియాపూర్‌కు చెందినవారిగా పోలీసులు గుర్తించారు. మరో మృతుడు నిమ్మకాయల అయ్యన్న తూర్పుగోదావరి జిల్లా రాయవరం మండలం సోమేశ్వరం గ్రామానికి చెందినవారని తెలిపారు. ఒకే ప్రమాదంలో ఇద్దరు ప్రాణాలు కోల్పోవడంతో వారి కుటుంబాల్లో విషాదం నెలకొంది. ప్రమాదం జరిగిన ప్రదేశంలో కొద్దిసేపు రాకపోకలకు అంతరాయం ఏర్పడింది. పోలీసులు పరిస్థితిని చక్కదిద్ది వాహనాలను క్రమంగా పంపించారు. ప్రమాదానికి సంబంధించిన పూర్తి వివరాలను తెలుసుకునేందుకు కేసు నమోదు చేసి దర్యాప్తు కొనసాగిస్తున్నారు.