క్రెడిట్ అవుట్ రీచ్‌లో పాల్గొనండి: ఎమ్మెల్యే బ్రహ్మానందరెడ్డి

పల్నాడు జిల్లా నరసరావుపేటలో నిర్వహించనున్న క్రెడిట్ అవుట్ రీచ్ కార్యక్రమాన్ని ప్రజలు పెద్ద సంఖ్యలో పాల్గొని విజయవంతం చేయాలని ఎమ్మెల్యే జూలకంటి బ్రహ్మానందరెడ్డి పిలుపునిచ్చారు. నరసరావుపేటలోని కోడెల శివప్రసాదరావు క్రీడా మైదానంలో శుక్రవారం నిర్వహించే భారీ రుణ మేళా ద్వారా పల్నాడు ప్రాంత ప్రజలకు ఆర్థికంగా అండగా నిలిచే అవకాశం కలుగుతుందని ఆయన తెలిపారు.

గురువారం స్థానిక క్యాంపు కార్యాలయంలో మీడియాతో మాట్లాడిన ఎమ్మెల్యే జూలకంటి బ్రహ్మానందరెడ్డి మాట్లాడుతూ వెనుకబడిన పల్నాడు జిల్లాలోని ప్రజలకు ఆర్థిక ప్రోత్సాహం అందించేందుకు ఈ క్రెడిట్ అవుట్ రీచ్ కార్యక్రమం ఎంతో ఉపయోగకరంగా ఉంటుందని పేర్కొన్నారు. బ్యాంకుల ద్వారా సుమారు రూ.1500 కోట్ల నుంచి రూ.2000 కోట్లకు పైగా రుణాలను అందించే లక్ష్యంతో ఈ భారీ రుణ మేళాను నిర్వహిస్తున్నట్లు తెలిపారు.

ఈ కార్యక్రమానికి ముఖ్యమంత్రి నారా చంద్రబాబు నాయుడు, కేంద్ర ఆర్థిక శాఖ మంత్రి నిర్మలా సీతారామన్ ముఖ్య అతిథులుగా హాజరవుతారని ఎమ్మెల్యే వెల్లడించారు. ప్రజలకు అవసరమైన ఆర్థిక సహాయం, వ్యాపార అభివృద్ధి అవకాశాలు, స్వయం ఉపాధి కార్యక్రమాలకు రుణ సౌకర్యాలు అందించడమే ఈ కార్యక్రమం ప్రధాన ఉద్దేశమని తెలిపారు.

మహిళా సాధికారతకు కూటమి ప్రభుత్వం అత్యంత ప్రాధాన్యత ఇస్తోందని ఎమ్మెల్యే జూలకంటి బ్రహ్మానందరెడ్డి అన్నారు. మహిళలు ఆర్థికంగా స్వావలంబన సాధించేందుకు బ్యాంకు రుణాలు, స్వయం సహాయక సంఘాలకు ఆర్థిక సహకారం వంటి కార్యక్రమాలు కీలకంగా నిలుస్తాయని పేర్కొన్నారు. ఈ రుణమేళా ద్వారా మహిళలు, యువత, రైతులు, చిన్న వ్యాపారులు తమ అవసరాలకు అనుగుణంగా రుణ సదుపాయాలను పొందవచ్చని తెలిపారు.

ఉదయం 10 గంటలకు ప్రారంభమయ్యే క్రెడిట్ అవుట్ రీచ్ కార్యక్రమానికి ప్రజలు పెద్ద సంఖ్యలో హాజరై అందుబాటులో ఉన్న అవకాశాలను వినియోగించుకోవాలని ఎమ్మెల్యే కోరారు. పల్నాడు ప్రాంత అభివృద్ధికి ఈ కార్యక్రమం ఎంతో దోహదపడుతుందని, ఆర్థిక కార్యకలాపాలు పెరిగి స్థానికంగా ఉపాధి అవకాశాలు కూడా మెరుగుపడతాయని ఆశాభావం వ్యక్తం చేశారు.

ప్రభుత్వం, బ్యాంకులు సమన్వయంతో నిర్వహిస్తున్న ఈ రుణ మేళా ద్వారా అర్హులైన ప్రతి ఒక్కరికీ అవసరమైన ఆర్థిక సహాయం అందేలా చర్యలు తీసుకుంటున్నామని తెలిపారు. ప్రజలు ముందుగా సమాచారం తెలుసుకుని కార్యక్రమంలో పాల్గొని తమకు అనుకూలమైన రుణ పథకాలను పొందాలని సూచించారు. పల్నాడు జిల్లా అభివృద్ధిలో ప్రతి ఒక్కరి భాగస్వామ్యం అవసరమని ఎమ్మెల్యే పేర్కొన్నారు.