వచ్చే ఏడాది భారత్‌కు ట్రంప్?.. మార్కో రుబియో కీలక ప్రకటన

అమెరికా అధ్యక్షుడు డొనాల్డ్ ట్రంప్ వచ్చే ఏడాది ప్రారంభంలో భారత్‌ను సందర్శించే అవకాశం ఉందని అమెరికా విదేశాంగ మంత్రి మార్కో రుబియో వెల్లడించారు. భారత్-అమెరికా మధ్య కొనసాగుతున్న ద్వైపాక్షిక వాణిజ్య చర్చల నేపథ్యంలో ఈ పర్యటనకు ప్రాధాన్యం ఏర్పడిందన్నారు. ప్రధానమంత్రి నరేంద్ర మోదీ, అధ్యక్షుడు ట్రంప్ మధ్య వ్యక్తిగత అనుబంధం ఎంతో బలంగా ఉందని, రెండు దేశాల సంబంధాలు ప్రస్తుతం అద్భుతంగా ఉన్నాయని రుబియో పేర్కొన్నారు. ఇటీవల ఫ్రాన్స్‌లో జరిగిన జీ7 సదస్సు సందర్భంగా మోదీ, ట్రంప్ 16 నెలల తర్వాత ద్వైపాక్షికంగా సమావేశమయ్యారు. వాణిజ్య అంశాలపై కూడా ట్రంప్ స్పందిస్తూ, ప్రస్తుతం భారత్‌తో అమెరికా "న్యాయమైన వ్యాపారం" చేస్తోందని వ్యాఖ్యానించారు. ప్రతిపాదిత పర్యటనలో ద్వైపాక్షిక వాణిజ్యం, రక్షణ, వ్యూహాత్మక భాగస్వామ్యం, సాంకేతిక సహకారం వంటి కీలక అంశాలపై ఇరు దేశాల మధ్య చర్చలు జరిగే అవకాశముందని అంతర్జాతీయ వర్గాలు భావిస్తున్నాయి. ఈ ప్రకటనతో ట్రంప్ భారత్ పర్యటనపై ఆసక్తి నెలకొంది.