దోనేపూడి రామచంద్రరావు మృతి తీరని లోటు: గద్దె రామమోహన్

చినఓగిరాల గ్రామానికి చెందిన సీనియర్ తెలుగుదేశం పార్టీ నేత దోనేపూడి రామచంద్రరావు మృతి తీరని లోటని విజయవాడ తూర్పు ఎమ్మెల్యే గద్దె రామమోహన్ పేర్కొన్నారు. ఉయ్యూరు మండలం చినఓగిరాలలో నిర్వహించిన దోనేపూడి రామచంద్రరావు పెద్దకర్మ కార్యక్రమంలో ప్రజా ప్రతినిధులు, తెలుగుదేశం పార్టీ నాయకులు పాల్గొని ఆయన చిత్రపటానికి పూలమాలలు వేసి ఘనంగా నివాళులర్పించారు. అనంతరం ఆయన కుటుంబ సభ్యులకు ప్రగాఢ సానుభూతి తెలిపారు.

ఈ కార్యక్రమంలో విజయవాడ తూర్పు శాసనసభ్యుడు గద్దె రామమోహన్, ఎన్టీఆర్ జిల్లా తెలుగుదేశం పార్టీ అధ్యక్షురాలు గద్దె అనురాధ, సాగునీటి వినియోగదారుల సంఘాల సమాఖ్య రాష్ట్ర అధ్యక్షుడు ఆళ్ళ వెంకట గోపాల కృష్ణారావు, ఉయ్యూరు మండల తెలుగుదేశం పార్టీ అధ్యక్షుడు వెనిగళ్ల కుటుంబరావు తదితరులు పాల్గొన్నారు.

ఈ సందర్భంగా గద్దె రామమోహన్ మాట్లాడుతూ దోనేపూడి రామచంద్రరావు సుదీర్ఘకాలంగా రాజకీయాల్లో కొనసాగుతూ తెలుగుదేశం పార్టీకి అంకితభావంతో పనిచేశారని తెలిపారు. 1983లో తెలుగుదేశం పార్టీ అధికారంలోకి వచ్చిన నాటి నుంచి ఎలాంటి పదవులు ఆశించకుండా పార్టీ సీనియర్ నాయకుడిగా గ్రామంలో కీలక పాత్ర పోషించారని పేర్కొన్నారు. స్థానిక ఎన్నికల్లో సర్పంచ్, ఎంపీటీసీ, ప్రాథమిక వ్యవసాయ సహకార సంఘం వంటి సంస్థల్లో తెలుగుదేశం పార్టీ మద్దతుదారుల విజయానికి ఆయన ఎంతో కృషి చేశారని తెలిపారు.

గ్రామ అభివృద్ధి కార్యక్రమాల్లో దోనేపూడి రామచంద్రరావు సేవలు చిరస్మరణీయమని గద్దె రామమోహన్ అన్నారు. ఇటీవల చినఓగిరాల గ్రామంలోని హిందూ శ్మశానవాటిక అభివృద్ధికి కూడా ఆయన తనవంతు సహకారం అందించారని గుర్తు చేశారు. పార్టీ అభివృద్ధితో పాటు గ్రామ ప్రజల సంక్షేమానికి ఆయన చేసిన సేవలు ఎప్పటికీ గుర్తుండిపోతాయని తెలిపారు.

దోనేపూడి రామచంద్రరావు లాంటి నాయకుల నిబద్ధత, సేవాభావం నేటి తరానికి ఆదర్శమని నాయకులు పేర్కొన్నారు. గ్రామ ప్రజలతో సన్నిహిత సంబంధాలు కలిగి ఉండి ప్రతి సమస్య పరిష్కారానికి ముందుండే వ్యక్తిగా ఆయన గుర్తింపు పొందారని తెలిపారు.

ఈ కార్యక్రమంలో రాష్ట్ర తెలుగురైతు ప్రధాన కార్యదర్శి కుర్రా నరేంద్ర, రాష్ట్ర ఫారెస్ట్ డెవలప్‌మెంట్ కార్పొరేషన్ డైరెక్టర్ గద్దె ప్రసాద్, లయన్స్ జిల్లా మాజీ గవర్నర్ మూల్పూరు ఉపేంద్ర, గ్రామ ఎంపీటీసీ సభ్యులు చేకూరి శివప్రసాద్, పీఏసీఎస్ అధ్యక్షుడు పాలడుగు రామకృష్ణ, తెలుగుదేశం పార్టీ నాయకులు ఓగిరాల నాగభూషణం, దోనేపూడి రమాదేవి, పాలడుగు మల్లికార్జునరావు, పాలడుగు అశోక్ తదితరులు పాల్గొన్నారు. దివంగత నాయకుడి సేవలను స్మరించుకుంటూ ఆయనకు ఘన నివాళులు అర్పించారు.