ఎల్‌ నినోపై రైతులకు శాస్త్రవేత్తల కీలక సూచనలు

బాపులపాడు మండలంలోని పలు గ్రామాల్లో ఎల్‌ నినో ప్రభావంతో ఏర్పడే ప్రతికూల వాతావరణ పరిస్థితులపై రైతులకు అవగాహన కల్పించేందుకు ఆచార్య ఎన్‌.జి. రంగా వ్యవసాయ విశ్వవిద్యాలయ శాస్త్రవేత్తల బృందం పర్యటించింది. వేలేరు, రేమల్లె, సింగన్నగూడెం, రంగన్నగూడెం గ్రామాల్లోని వరి, చెరుకు, పామాయిల్‌ పంటలను పరిశీలించి రైతులకు పలు సూచనలు చేశారు. ప్రస్తుత వాతావరణ మార్పుల నేపథ్యంలో పంటలపై ప్రభావం పడకుండా తీసుకోవాల్సిన జాగ్రత్తలను వివరించారు.

రంగన్నగూడెంలో జరిగిన కార్యక్రమంలో కేవీకే ఘంటసాల సమన్వయకర్త డాక్టర్‌ డి. సుధారాణి, గుంటూరు పోస్టు గ్రాడ్యుయేట్‌ సెంటర్‌ డీన్‌ డాక్టర్‌ టీ. శ్రీనివాస్‌ తదితర శాస్త్రవేత్తలు పాల్గొన్నారు. వరి పంటలో ఇనుము ధాతు లోపం కనిపిస్తే దాని నివారణకు అన్నభేది, నిమ్మ ఉప్పు కలిపిన ద్రావణాన్ని పిచికారీ చేయాలని సూచించారు. లీటరు నీటికి 20 గ్రాముల అన్నభేది, 2 గ్రాముల నిమ్మ ఉప్పు కలిపి వారం రోజుల వ్యవధిలో రెండు సార్లు పిచికారీ చేస్తే ప్రయోజనం ఉంటుందని తెలిపారు.

ప్రస్తుత వాతావరణ పరిస్థితుల్లో వరి పంటకు సుడిదోమ సమస్య వచ్చే అవకాశం ఉందని శాస్త్రవేత్తలు హెచ్చరించారు. ఈ సమస్య నివారణకు పైమెట్రోజన్ మందును ఎకరానికి సూచించిన మోతాదులో పిచికారీ చేయాలని రైతులకు సూచనలు ఇచ్చారు. పంటలను నిరంతరం పరిశీలిస్తూ తెగుళ్లు, పురుగుల ఉధృతి ప్రారంభ దశలోనే గుర్తించి చర్యలు తీసుకోవాలని సూచించారు.

చెరుకు పంటను పరిశీలించిన శాస్త్రవేత్తలు తెల్లదోమ ఉధృతి ఎక్కువగా ఉన్నట్లు గుర్తించారు. దీనిని నియంత్రించేందుకు ఇమిడాక్లోప్రిడ్ మందును ఎకరానికి సూచించిన మోతాదులో వినియోగించాలని రైతులకు తెలిపారు. పంటల రక్షణకు శాస్త్రీయ పద్ధతులను పాటించడం ద్వారా నష్టాలను తగ్గించుకోవచ్చని వివరించారు.

నాగార్జునసాగర్‌ ఎడమ కాలువ ప్రాజెక్టు కమిటీ వైస్‌ చైర్మన్‌ ఆళ్ల వెంకట గోపాల కృష్ణారావు మాట్లాడుతూ మండలంలోని ప్రాథమిక వ్యవసాయ సహకార సంఘాల్లో రైతులకు అవసరమైన యూరియా, డీఏపీ ఎరువులు అందుబాటులో ఉండేలా చర్యలు తీసుకోవాలని కోరారు. ఎల్‌ నినో పరిస్థితుల్లో పామాయిల్‌ పంటలో పొత్తులు సరిగా రాకపోవడంపై రైతులకు ప్రత్యేక అవగాహన కల్పించాలని శాస్త్రవేత్తలను కోరారు.

ఈ కార్యక్రమంలో చిరుధాన్యాల ప్రధాన శాస్త్రవేత్త డాక్టర్‌ చంద్రమోహన్‌ రెడ్డి, అధ్యాపకురాలు డాక్టర్‌ ప్రభావతి, సస్యరక్షణ శాస్త్రవేత్త డాక్టర్‌ రేవతి, మండల వ్యవసాయ అధికారి రంగనాథ్‌ బాబు, గ్రామ వ్యవసాయ సహాయకులు, విద్యార్థులు, రైతు ప్రతినిధులు పాల్గొన్నారు. ఎల్‌ నినో వంటి వాతావరణ మార్పులను దృష్టిలో ఉంచుకుని రైతులు శాస్త్రవేత్తల సూచనలు పాటిస్తే పంట దిగుబడులను కాపాడుకోవచ్చని అధికారులు తెలిపారు.