జర్నలిస్టులకు ఇళ్ల స్థలాలు ఇవ్వాలి: గళ్ళా మాధవి

అమరావతి వెలగపూడిలో జరుగుతున్న ఆంధ్రప్రదేశ్ శాసనసభ వర్షాకాల సమావేశాల్లో గుంటూరు పశ్చిమ నియోజకవర్గ ఎమ్మెల్యే గళ్ళా మాధవి జర్నలిస్టుల సమస్యలను ప్రస్తావించారు. సభలోని శూన్యకాలంలో మాట్లాడిన ఆమె, ప్రజాస్వామ్యానికి నాలుగో స్థంభంగా భావించే జర్నలిస్టులకు గృహ సౌకర్యం కల్పించాలని ప్రభుత్వాన్ని కోరారు. సమాజంలో జరుగుతున్న అన్యాయాలు, ప్రజా సమస్యలు, ప్రభుత్వ సంక్షేమ కార్యక్రమాలను ప్రజలకు చేరవేయడంలో జర్నలిస్టులు కీలక పాత్ర పోషిస్తున్నారని పేర్కొన్నారు. క్షేత్రస్థాయిలో నిరంతరం పనిచేస్తున్న జర్నలిస్టుల సమస్యలను ప్రభుత్వం ప్రత్యేకంగా పరిగణనలోకి తీసుకోవాల్సిన అవసరం ఉందని తెలిపారు.

ప్రింట్, ఎలక్ట్రానిక్, డిజిటల్ మాధ్యమాల్లో పనిచేస్తున్న జర్నలిస్టుల్లో అధిక శాతం మంది తక్కువ వేతనాలతో విధులు నిర్వహిస్తున్నారని గళ్ళా మాధవి సభ దృష్టికి తీసుకువచ్చారు. తక్కువ ఆదాయంతో కుటుంబాలను పోషించుకోవడంతో పాటు సొంతంగా ఇల్లు నిర్మించుకోవడం వారికి పెద్ద సవాల్‌గా మారిందని వివరించారు. క్షేత్రస్థాయిలో వార్తల సేకరణ కోసం నిరంతరం తిరుగుతూ విధులు నిర్వహించే జర్నలిస్టులకు వృత్తిపరంగా స్థిరత్వం, నిర్దిష్టమైన పనివేళలు లేకపోవడం వల్ల అనేక ఇబ్బందులు ఎదురవుతున్నాయని పేర్కొన్నారు. వారి కుటుంబాల భవిష్యత్తును దృష్టిలో ఉంచుకుని సామాజిక భద్రత కల్పించాల్సిన అవసరం ఉందన్నారు.

జర్నలిస్టులకు ప్రభుత్వం అందించే ఆరోగ్య కార్డులు, గృహనిర్మాణ పథకాలు వంటి ప్రోత్సాహకాలు వారి కుటుంబాలకు ఎంతో ఉపయోగకరంగా ఉంటాయని ఎమ్మెల్యే గళ్ళా మాధవి తెలిపారు. ఆరోగ్య సమస్యలు ఎదురైనప్పుడు వైద్య సదుపాయాలు, నివాస భద్రత విషయంలో ప్రభుత్వ సహాయం జర్నలిస్టులకు అండగా నిలుస్తుందని చెప్పారు. విధి నిర్వహణలో ఎదురయ్యే ఒత్తిళ్ల మధ్య కుటుంబ అవసరాలను కూడా చూసుకోవాల్సి ఉంటుందని, అందువల్ల జర్నలిస్టుల సంక్షేమానికి ప్రత్యేక ప్రాధాన్యం ఇవ్వాలని ప్రభుత్వాన్ని కోరారు.

ఉమ్మడి ఆంధ్రప్రదేశ్‌లో జర్నలిస్టుల కోసం జూబ్లీహిల్స్ వంటి ప్రాంతాల్లో కాలనీలు ఏర్పాటు చేసిన విషయాన్ని గళ్ళా మాధవి గుర్తు చేశారు. గతంలో జర్నలిస్టుల గృహ అవసరాలను గుర్తించి కాలనీల రూపంలో సౌకర్యాలు కల్పించిన విధానాన్ని ప్రస్తావిస్తూ, విభజిత ఆంధ్రప్రదేశ్‌లో కూడా అదే తరహాలో జర్నలిస్టులకు నివాస సౌకర్యం కల్పించాల్సిన అవసరం ఉందన్నారు. రాష్ట్రంలోని వివిధ జిల్లాల్లో విధులు నిర్వహిస్తున్న జర్నలిస్టుల పరిస్థితులను పరిగణనలోకి తీసుకుని వారికి సొంత ఇంటి కలను సాకారం చేసేలా చర్యలు చేపట్టాలని సూచించారు.

ప్రతి వర్గాన్ని తన కుటుంబ సభ్యులుగా భావించి వారి అభ్యున్నతికి కృషి చేసే నాయకుడు ముఖ్యమంత్రి నారా చంద్రబాబు నాయుడు అని గళ్ళా మాధవి పేర్కొన్నారు. జర్నలిస్టుల సంక్షేమం విషయంలో కూడా ముఖ్యమంత్రి ప్రత్యేక చొరవ తీసుకుంటారనే ఆశాభావం వ్యక్తం చేశారు. విభజిత ఆంధ్రప్రదేశ్‌లో జర్నలిస్టులకు గృహ సౌకర్యాలు కల్పించాలనే లక్ష్యంతో జి.ఓ. నెం. 67, 107లను తీసుకువచ్చిన విషయాన్ని ఆమె సభలో గుర్తుచేశారు. ఈ ఉత్తర్వుల అమలు ద్వారా జర్నలిస్టులకు నివాస భద్రత కల్పించవచ్చని తెలిపారు.

రాష్ట్రంలోని ప్రతి జిల్లాలో అక్రిడిటేషన్ కలిగిన జర్నలిస్టులకు ఇళ్ల స్థలాలు లేదా గృహ సౌకర్యం కల్పించాలని గళ్ళా మాధవి ముఖ్యమంత్రి చంద్రబాబు నాయుడిని సభా వేదికగా కోరారు. జర్నలిస్టులు తమ వృత్తి ద్వారా ప్రజల సమస్యలను ప్రభుత్వ దృష్టికి తీసుకువస్తున్నందున, వారి సంక్షేమాన్ని కూడా ప్రభుత్వం బాధ్యతగా చూడాలని సూచించారు. సొంత ఇంటి సౌకర్యం కల్పించడం ద్వారా జర్నలిస్టుల కుటుంబాలకు దీర్ఘకాలిక భద్రత ఏర్పడుతుందని తెలిపారు. జర్నలిస్టుల సమస్యల పరిష్కారానికి ప్రభుత్వం సానుకూలంగా స్పందించి తగిన నిర్ణయం తీసుకోవాలని ఆమె కోరారు.