గౌడ సంక్షేమంపై కీలక నిర్ణయాలు..

విజయవాడ గొల్లపూడిలోని బీసీ భవన్‌లో రాష్ట్ర గౌడ వెల్ఫేర్ అండ్ డెవలప్‌మెంట్ కార్పొరేషన్ డైరెక్టర్ల సమావేశం నిర్వహించారు. కార్పొరేషన్ చైర్మన్ వీరంకి వెంకట గురుమూర్తి, జనరల్ మేనేజర్ జిఎం భీమ శంకర్ అధ్యక్షతన జరిగిన ఈ సమావేశంలో గౌడ సామాజిక వర్గ అభివృద్ధి, సంక్షేమం, ఉపాధి అవకాశాలు, విద్యా ప్రోత్సాహం వంటి పలు కీలక అంశాలపై చర్చించారు.

గౌడ కుటుంబాల ఆర్థిక అభివృద్ధికి అవసరమైన చర్యలు తీసుకోవాలని సమావేశంలో పలువురు డైరెక్టర్లు సూచించారు. ముఖ్యంగా నీరా పరిశ్రమ అభివృద్ధికి ప్రత్యేకంగా తాడి బోర్డు ఏర్పాటు చేసి, పరిశ్రమ విస్తరణ కోసం రూ.1000 కోట్ల నిధులు కేటాయించాలని ప్రభుత్వానికి ప్రతిపాదించాలని నిర్ణయించారు. తాటి ఆధారిత ఉత్పత్తులకు ప్రోత్సాహం కల్పించడం ద్వారా గౌడ కుటుంబాలకు స్థిరమైన ఆదాయ మార్గాలు ఏర్పడతాయని అభిప్రాయపడ్డారు.

గౌడ విద్యార్థులు, విద్యార్థినులకు ఉన్నత విద్యలో మరిన్ని అవకాశాలు కల్పించేందుకు విదేశీ విద్య పథకాన్ని అమలు చేయాలని సమావేశంలో ప్రతిపాదించారు. ఆర్థిక ఇబ్బందుల కారణంగా ఉన్నత విద్యకు దూరమవుతున్న విద్యార్థులకు ప్రభుత్వం అండగా నిలవాలని కోరారు. విద్య ద్వారా గౌడ యువత అభివృద్ధి సాధించేలా ప్రత్యేక ప్రణాళికలు రూపొందించాలని నిర్ణయించారు.

కల్లు గీత వృత్తిపై ఆధారపడే కుటుంబాలకు ఉపాధి లేని పరిస్థితుల్లో ఆర్థిక భరోసా కల్పించే అంశంపై కూడా చర్చ జరిగింది. గౌడ కుటుంబాలకు నెలకు రూ.20 వేల ఆర్థిక సహాయం అందించే విధంగా చర్యలు తీసుకోవాలని ప్రతిపాదించారు. వృత్తిపరమైన సమస్యలు ఎదురైన సమయంలో కుటుంబాలకు భరోసా కల్పించాల్సిన అవసరం ఉందని పేర్కొన్నారు.

గౌడ సామాజిక వర్గానికి చెందిన కమ్యూనిటీ భవనాల నిర్మాణానికి అవసరమైన స్థలాలు, నిధులు మంజూరు చేయాలని ప్రభుత్వాన్ని కోరాలని నిర్ణయించారు. సామాజిక కార్యక్రమాలు, యువత అభివృద్ధి కార్యక్రమాలు నిర్వహించేందుకు కమ్యూనిటీ భవనాలు ఉపయోగపడతాయని తెలిపారు.

కల్లు గీత కార్మికుల భద్రతకు సంబంధించిన అంశాలపై కూడా సమావేశంలో చర్చించారు. ప్రమాదవశాత్తు మరణించిన కార్మికుల కుటుంబాలకు, అంగవైకల్యం చెందిన వారికి అందించాల్సిన ఎక్స్‌గ్రేషియా నిధులు గత ప్రభుత్వ కాలంలో పెండింగ్‌లో ఉన్నాయని, వాటిని వెంటనే విడుదల చేయాలని కోరారు. కార్మిక కుటుంబాలకు ప్రభుత్వం అండగా నిలవాలని తెలిపారు.

చరిత్రలో ప్రత్యేక స్థానం పొందిన సర్దార్ సర్వాయి పాపన్న గౌడ్ జయంతి కార్యక్రమాన్ని ప్రభుత్వం అధికారికంగా నిర్వహించాలని సమావేశంలో తీర్మానించారు. ఆయన సేవలు, పోరాట స్ఫూర్తిని భవిష్యత్ తరాలకు తెలియజేసే విధంగా అధికారిక కార్యక్రమాలు నిర్వహించాలని కోరారు.

ఈ సందర్భంగా సమావేశంలో పాల్గొన్న నాయకులు మాట్లాడుతూ ముఖ్యమంత్రి చంద్రబాబు నాయుడు నేతృత్వంలోని కూటమి ప్రభుత్వం రాష్ట్రంలోని గౌడ కుటుంబాల అభివృద్ధికి అనేక చర్యలు చేపడుతోందని తెలిపారు. సంక్షేమ పథకాలు, అభివృద్ధి కార్యక్రమాలతో పాటు పేద గౌడ కుటుంబాలకు ఉపాధి అవకాశాలు కల్పించే విధంగా సబ్సిడీ రుణాలు, చేతివృత్తుల వారికి అవసరమైన పనిముట్లు అందించే కార్యక్రమాలు అమలు చేస్తున్నారని పేర్కొన్నారు.

గౌడ సామాజిక వర్గంలోని ప్రతి కుటుంబానికి ప్రభుత్వ పథకాలు చేరేలా చర్యలు తీసుకోవాలని సమావేశంలో నిర్ణయించారు. రాష్ట్రవ్యాప్తంగా గౌడ సంఘాలు, కుటుంబాలకు కూటమి ప్రభుత్వం అమలు చేస్తున్న సంక్షేమ కార్యక్రమాలపై అవగాహన కల్పించేందుకు ప్రత్యేక కార్యక్రమాలు రూపొందించాలని తీర్మానం చేశారు.

గౌడ యువతకు ఉపాధి, విద్యార్థులకు విద్యా అవకాశాలు, కార్మికులకు భద్రత, కుటుంబాలకు ఆర్థిక సహాయం వంటి అంశాలకు ప్రాధాన్యం ఇస్తూ భవిష్యత్ కార్యాచరణ రూపొందించాలని నిర్ణయించారు.

ఈ కార్యక్రమంలో రాష్ట్ర గౌడ వెల్ఫేర్ అండ్ డెవలప్‌మెంట్ కార్పొరేషన్ డైరెక్టర్లు శొంఠి శివరామ ప్రసాద్ గౌడ్, మట్ట ప్రకాష్ గౌడ్, వీరమల్ల వరలక్ష్మి, కందుల వెంకటరమణ, జంపాని రామచంద్ర గౌడ్, బడుగు శ్రీకాంత్, వెలగాన సూర్యారావు, పామర్తి వెంకటరామయ్య, మట్ట మంగరాజు, తుమ్మల చంగయ్యతో పాటు బీసీ కార్పొరేషన్ సిబ్బంది పాల్గొన్నారు.