ఇమ్రాన్‌ఖాన్‌ విడుదలకు డిమాండ్..

పాకిస్థాన్ మాజీ ప్రధాని, పాకిస్థాన్ తెహ్రీకే ఇన్సాఫ్ పార్టీ అధ్యక్షుడు ఇమ్రాన్ ఖాన్ అరెస్టై మూడేళ్లు పూర్తయిన సందర్భంగా దేశవ్యాప్తంగా మరోసారి నిరసనలు చెలరేగాయి. ఇమ్రాన్ ఖాన్‌ను వెంటనే విడుదల చేయాలని డిమాండ్ చేస్తూ ఆయన మద్దతుదారులు పలు ప్రాంతాల్లో ఆందోళనలు చేపట్టారు. ఈ నిరసనల సందర్భంగా చోటుచేసుకున్న ఘర్షణల్లో 100 మందికి పైగా అరెస్టు చేసినట్లు సమాచారం.

ఇమ్రాన్ ఖాన్‌కు న్యాయం చేయాలని, ఆయన హక్కులను పునరుద్ధరించాలని డిమాండ్ చేస్తూ పాకిస్థాన్ తెహ్రీకే ఇన్సాఫ్ పార్టీ కార్యకర్తలు, అభిమానులు వీధుల్లోకి వచ్చారు. ఈ నిరసనలు ప్రధానంగా పీటీఐ పార్టీ ప్రభావం ఎక్కువగా ఉన్న ఖైబర్ ఫఖ్తుంఖ్వా ప్రాంతంలో ప్రారంభమయ్యాయి. అనంతరం లాహోర్‌, రావల్పిండి, కరాచీ వంటి ప్రధాన నగరాలకు కూడా విస్తరించాయి.

పలు ప్రాంతాల్లో ఇమ్రాన్ ఖాన్ మద్దతుదారులు భారీ ప్రదర్శనలు నిర్వహించారు. మాజీ ప్రధానికి న్యాయపరమైన హక్కులు కల్పించాలని, ఆయనను వెంటనే విడుదల చేయాలని నినాదాలు చేశారు. పరిస్థితి అదుపు తప్పకుండా పోలీసులు రంగంలోకి దిగారు. నిరసనకారులను చెదరగొట్టేందుకు లాఠీఛార్జ్ చేయడంతో పాటు బాష్పవాయువును ప్రయోగించినట్లు సమాచారం.

ఖైబర్ ఫఖ్తుంఖ్వా ముఖ్యమంత్రి, పీటీఐ నేత ముహమ్మద్ సోహైల్ అఫ్రిదీ ఈ సందర్భంగా పాకిస్థాన్ ప్రభుత్వానికి గడువు విధించారు. సెప్టెంబర్ 27లోగా ఇమ్రాన్ ఖాన్, ఆయన భార్యపై నమోదైన కేసుల్లో న్యాయపరమైన ప్రక్రియను సక్రమంగా కొనసాగించాలని డిమాండ్ చేశారు. అలాగే జైలులో ఉన్న ఇమ్రాన్ ఖాన్‌ను ఆయన న్యాయవాదులు, వైద్య సిబ్బంది కలిసేందుకు అనుమతి ఇవ్వాలని కోరారు.

రాజధాని నగరం పెషావర్‌లో పార్టీ మద్దతుదారులను ఉద్దేశించి సోహైల్ అఫ్రిదీ మాట్లాడారు. ఇమ్రాన్ ఖాన్‌కు న్యాయం జరగకపోతే సెప్టెంబర్ 27న పాకిస్థాన్ ప్రజలు ఇస్లామాబాద్‌కు మార్చ్ నిర్వహిస్తారని హెచ్చరించారు. ప్రభుత్వంపై ఒత్తిడి పెంచేందుకు భారీ నిరసనలకు సిద్ధమవుతున్నట్లు ఆయన సంకేతాలు ఇచ్చారు.

ఇదిలా ఉండగా, జైలులో ఉన్న ఇమ్రాన్ ఖాన్ ఆరోగ్య పరిస్థితిపై ఆయన కుటుంబ సభ్యులు, పార్టీ నేతలు ఆందోళన వ్యక్తం చేస్తున్నారు. ఆయనకు సరైన వైద్య సదుపాయాలు అందడం లేదని, చూపు మందగించిందని ఆరోపిస్తున్నారు. జైలు పరిస్థితులపై కూడా పీటీఐ నేతలు ప్రశ్నలు లేవనెత్తుతున్నారు.

మరోవైపు, ఇమ్రాన్ ఖాన్‌కు న్యాయమైన విచారణ హక్కు నిరాకరించారని, సుదీర్ఘకాలం పాటు ఏకాంత నిర్బంధంలో ఉంచారని మానవ హక్కుల సంస్థ అమ్నెస్టీ ఇంటర్నేషనల్ ఆరోపించింది. ఖైదీల హక్కులు, న్యాయ ప్రక్రియలో పారదర్శకత వంటి అంశాలపై ఆ సంస్థ ఆందోళన వ్యక్తం చేసింది.

ఇమ్రాన్ ఖాన్ అరెస్టు, ఆయనపై కొనసాగుతున్న కేసులు పాకిస్థాన్ రాజకీయాల్లో కీలక అంశాలుగా మారాయి. ఆయన మద్దతుదారులు విడుదల కోసం ఉద్యమిస్తుండగా, ప్రభుత్వం మాత్రం చట్టపరమైన ప్రక్రియ కొనసాగుతోందని చెబుతోంది. తాజా నిరసనల నేపథ్యంలో పాకిస్థాన్‌లో రాజకీయ వాతావరణం మరోసారి వేడెక్కింది.