గాజాలో రోజూ 40 మందిని చంపాలన్న ఇజ్రాయెల్‌ నేత

జెరూసలేం: ఇజ్రాయెల్‌ ప్రధాని బెంజమిన్‌ నెతన్యాహు నేతృత్వంలోని సంకీర్ణ ప్రభుత్వంలో కీలకంగా ఉన్న జాతీయ భద్రతా మంత్రి ఇటామర్‌ బెన్‌ గ్విర్‌ గాజాపై తీవ్ర వ్యాఖ్యలు చేశారు. గాజాలో ప్రతిరోజూ 30 నుంచి 40 మందిని లక్ష్యంగా చేసుకుని హతమార్చాలని ఆయన బహిరంగంగా సూచించారు. మాజీ బందీ రోమ్‌ బ్రాస్లావ్‌స్కీ నిర్వహించిన కార్యక్రమంలో మాట్లాడిన బెన్‌ గ్విర్‌.. గాజాపై ఇజ్రాయెల్‌ దాడులు తగ్గించడాన్ని తప్పుబట్టారు. ప్రధానమంత్రి నెతన్యాహుతో తనకు ఈ విషయంలో విభేదాలు ఉన్నాయని చెప్పారు. గాజాలో లక్షిత హత్యలు కొనసాగిస్తూ ప్రతిరాత్రి పెద్ద సంఖ్యలో వ్యక్తులను అంతమొందించాలని ఆయన పేర్కొన్నారు.

గాజాలోని ప్రజలపై బెన్‌ గ్విర్‌ చేసిన వ్యాఖ్యలు తీవ్ర వివాదానికి దారితీశాయి. తక్షణ ముప్పుగా భావించే వ్యక్తులకే పరిమితం కాకుండా, గాజాలో మరికొందరిని కూడా చంపాలని ఆయన వ్యాఖ్యానించారు. గతంలోనూ బెన్‌ గ్విర్‌, ఇతర ఇజ్రాయెల్‌ నేతలు ఇలాంటి తీవ్ర వ్యాఖ్యలు చేసిన సందర్భాలు ఉన్నాయి. ఆ వ్యాఖ్యలను అంతర్జాతీయంగా పలువురు తీవ్రంగా ఖండించారు. గాజాలో ఇజ్రాయెల్‌ చర్యల వెనుక ఉద్దేశాలను పరిశీలించే అంతర్జాతీయ న్యాయ ప్రక్రియల్లో ఇలాంటి ప్రకటనలను ఆధారాలుగా సమర్పించిన సందర్భాలు కూడా ఉన్నాయి. అయితే గాజాలో తాము మారణహోమానికి పాల్పడుతున్నామన్న ఆరోపణలను ఇజ్రాయెల్‌ తిరస్కరిస్తోంది.

బెన్‌ గ్విర్‌కు ఇజ్రాయెల్‌ సైన్యంపై నేరుగా ఆదేశాలు ఇచ్చే అధికారం లేదు. గాజాపై సైనిక దాడులను నిర్వహించే నిర్ణయాలు ఆయన పరిధిలోకి రావు. అయినప్పటికీ దేశ భద్రతా వ్యవస్థలో ఆయనకు గణనీయమైన ప్రభావం ఉంది. ఇజ్రాయెల్‌ జాతీయ పోలీసు దళంతో పాటు దేశంలోని జైళ్ల వ్యవస్థపై ఆయన పర్యవేక్షణ ఉంటుంది. గాజా, వెస్ట్‌ బ్యాంక్‌ ప్రాంతాలకు చెందిన వేలాది మంది పాలస్తీనియన్లు ఇజ్రాయెల్‌ జైళ్లలో ఉన్న నేపథ్యంలో ఆయన బాధ్యతలు మరింత ప్రాధాన్యం సంతరించుకున్నాయి. పాలస్తీనా ఖైదీలకు అందించే ఆహారంపై కూడా గతంలో బెన్‌ గ్విర్‌ చేసిన వ్యాఖ్యలు వివాదాస్పదమయ్యాయి. పాలస్తీనా ఖైదీలకు కనీస పోషకాహారం అందకుండా చేస్తున్నారని ఆరోపణలు రావడంతో ఇజ్రాయెల్‌ అత్యున్నత న్యాయస్థానం కూడా జైళ్ల వ్యవస్థపై స్పందించింది.

ఇటీవల గాజాపై ఇజ్రాయెల్‌ వైమానిక దాడుల తీవ్రత కొంత తగ్గినట్లు సమాచారం. కాల్పుల విరమణ ఒప్పందం అమల్లోకి వచ్చిన తర్వాత కూడా గాజాలో ఇజ్రాయెల్‌ దాడుల కారణంగా భారీ సంఖ్యలో ప్రజలు మరణించినట్లు గాజా ఆరోగ్య శాఖ తెలిపింది. దాడులు ప్రధానంగా హమాస్‌ యోధులను లక్ష్యంగా చేసుకున్నవేనని ఇజ్రాయెల్‌ సైన్యం చెబుతోంది. అమెరికా అధ్యక్షుడు డొనాల్డ్‌ ట్రంప్‌ కాల్పుల విరమణను ముందుకు తీసుకెళ్లేందుకు ప్రయత్నిస్తున్న సమయంలో దాడులు తగ్గడం చోటుచేసుకుంది. గాజాపై దాడులకు అనుమతులు ఇచ్చే అధికారాన్ని సైన్యాధిపతికి మాత్రమే పరిమితం చేసినట్లు ఇజ్రాయెల్‌ మీడియా కథనాలు పేర్కొన్నాయి. ఈ పరిణామం బెన్‌ గ్విర్‌ వంటి కుడిపక్ష నేతల్లో అసంతృప్తికి కారణమైంది.

ఇదే సమయంలో గాజా నుంచి పాలస్తీనియన్లను పెద్ద సంఖ్యలో ఇతర ప్రాంతాలకు తరలించాలని కూడా బెన్‌ గ్విర్‌ ప్రతిపాదించారు. గాజాలో ఇజ్రాయెల్‌ నివాస ప్రాంతాలను ఏర్పాటు చేయాలని ఆయన కోరారు. గతంలో గాజా నుంచి ఇజ్రాయెల్‌ తన సైన్యాన్ని, నివాసాలను ఉపసంహరించుకున్న విషయాన్ని ప్రస్తావిస్తూ.. గాజా మొత్తాన్ని ఇజ్రాయెల్‌కు చెందిన ప్రాంతంగా చూడాలని ఆయన వ్యాఖ్యానించారు. పాలస్తీనియన్లు పెద్ద సంఖ్యలో వలస వెళ్లేలా ప్రోత్సహించాలని, హమాస్‌కు చెందిన వ్యక్తులను మాత్రం హతమార్చాలని ఆయన తీవ్ర వ్యాఖ్యలు చేశారు.

గాజా భవిష్యత్తుపై ఇజ్రాయెల్‌, హమాస్‌ మధ్య విభేదాలు కొనసాగుతున్నాయి. ట్రంప్‌ ప్రతిపాదనలో భాగంగా హమాస్‌ క్రమంగా ఆయుధాలను వదులుకోవడం, ఇజ్రాయెల్‌ దాడులను నిలిపివేసి సైన్యాన్ని వెనక్కి తీసుకోవడం వంటి అంశాలు ఉన్నాయి. ఈ ప్రతిపాదనను హమాస్‌ అంగీకరించినప్పటికీ, భారీ ఆయుధాలను అప్పగించడం పాలస్తీనా దేశ ఏర్పాటుతో ముడిపడి ఉండాలని ఆ సంస్థ స్పష్టం చేసింది. అయితే నెతన్యాహు ప్రభుత్వం హమాస్‌ పూర్తిగా నిరాయుధీకరణ చెందే వరకు గాజాలోని తమ వైఖరిలో ఎలాంటి వెనుకడుగు ఉండదని చెబుతోంది. దీంతో కాల్పుల విరమణలోని ఇతర అంశాలు, అంతర్జాతీయ బలగాల మోహరింపు, గాజా పునర్నిర్మాణం వంటి ప్రక్రియలు కూడా అనిశ్చితిలోనే కొనసాగుతున్నాయి.