క్రియేటివ్ ఎకానమీకి ఏపీ కేరాఫ్ అడ్రస్: మంత్రి దుర్గేష్

ఆంధ్రప్రదేశ్‌ను క్రియేటివ్ ఎకానమీకి సరికొత్త గమ్యస్థానంగా తీర్చిదిద్దేందుకు ప్రభుత్వం కృషి చేస్తోందని సినిమాటోగ్రఫీ మంత్రి కందుల దుర్గేష్ తెలిపారు. రాజమహేంద్రవరంలో ఫిల్మ్ అండ్ టెలివిజన్ ప్రమోషన్ కౌన్సిల్ ఆఫ్ ఇండియా అధికారిక లోగో, పోస్టర్లను మంత్రి ఆవిష్కరించారు. ఈ సందర్భంగా సినీ, వినోద రంగ అభివృద్ధిపై కీలక వ్యాఖ్యలు చేశారు.

ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ నాయకత్వంలో రాష్ట్రంలో క్రియేటివ్ ఎకానమీ అభివృద్ధికి ప్రత్యేక ప్రాధాన్యత ఇస్తున్నామని మంత్రి పేర్కొన్నారు. ఆంధ్రప్రదేశ్‌ను వినోద రంగానికి ప్రముఖ కేంద్రంగా నిలిపేందుకు అవసరమైన చర్యలు తీసుకుంటున్నామని తెలిపారు.

గతంలో తెలుగు, తమిళం, హిందీ వంటి ప్రాంతీయ చిత్రాలుగా సినిమా రంగాన్ని చూసేవారని, ప్రస్తుతం పాన్ ఇండియా సినిమాలు, ఓటీటీ వేదికల రాకతో వినోద రంగంలో భారీ మార్పులు వచ్చాయని మంత్రి అన్నారు. భాషల సరిహద్దులు దాటి సినిమాలు ప్రేక్షకులకు చేరుతున్నాయని పేర్కొన్నారు.

‘వన్ ఇండియా - వన్ సినిమా’ లక్ష్యంతో ఫిల్మ్ అండ్ టెలివిజన్ ప్రమోషన్ కౌన్సిల్ ఆఫ్ ఇండియా చేస్తున్న ప్రయత్నాలను మంత్రి అభినందించారు. దేశవ్యాప్తంగా ఒకే వినోద వేదికను నిర్మించే దిశగా ఈ కార్యక్రమం ఉపయోగపడుతుందని తెలిపారు. థియేటర్, టెలివిజన్, ఓటీటీ రంగాలు సమాంతరంగా అభివృద్ధి చెందడం ప్రభుత్వ లక్ష్యమని వెల్లడించారు.

రాష్ట్రంలో సినీ రంగ అభివృద్ధికి ఆంధ్రప్రదేశ్ ప్రభుత్వం పూర్తి సహకారం అందిస్తుందని మంత్రి కందుల దుర్గేష్ హామీ ఇచ్చారు. భవిష్యత్తులో ఫిల్మ్, టెలివిజన్, థియేటర్ కార్యకలాపాలను అమరావతి, తిరుపతి కేంద్రాలుగా విస్తరించేందుకు ప్రణాళికలు రూపొందిస్తున్నట్లు తెలిపారు.

భారతదేశంలోని సినీ సాంకేతిక, వినోద రంగాలను ఒకే వేదికపైకి తీసుకురావడానికి ఎఫ్‌టీపీసీ చేస్తున్న కృషిని మంత్రి ప్రశంసించారు. సినీ పరిశ్రమ ద్వారా ఉపాధి అవకాశాలు, పర్యాటక అభివృద్ధి, ఆర్థిక వృద్ధికి అవకాశాలు పెరుగుతాయని పేర్కొన్నారు.

ఈ కార్యక్రమంలో ఎఫ్‌టీపీసీ ఇండియా అధ్యక్షుడు చైతన్య జంగా, కార్యదర్శి వర్మ పాకలపాటి, సఖి శక్తి వెల్ఫేర్ ఫౌండేషన్ అధ్యక్షురాలు జయ పటేరియా తదితర ప్రతినిధులు పాల్గొన్నారు. ఆంధ్రప్రదేశ్‌లో వినోద రంగానికి కొత్త అవకాశాలు తీసుకురావడమే లక్ష్యంగా ఈ కార్యక్రమాలు కొనసాగుతాయని తెలిపారు.