కోడెర్మాలో దంపతుల అరెస్ట్.. ఉగ్ర కార్యకలాపాలపై దర్యాప్తు

జార్ఖండ్‌లోని కోడెర్మా జిల్లాలో అనుమానిత ఉగ్రవాద, దేశ వ్యతిరేక కార్యకలాపాలకు పాల్పడుతున్నారనే ఆరోపణలతో ఓ జంటను ఇంటెలిజెన్స్ బ్యూరో, పోలీసులు అరెస్ట్ చేశారు. సాత్‌గావన్ పోలీస్ స్టేషన్ పరిధిలోని మాధోపూర్ గ్రామంలో ఈ అరెస్టులు జరిగాయి. అరెస్టైన వారిని అర్సాద్ మహ్ఫూజ్, షహీన్ పర్వీన్ అలియాస్ ముస్కాన్‌గా పోలీసులు గుర్తించారు. ఇద్దరూ అదే గ్రామానికి చెందిన వారిగా వెల్లడించారు.

నిఘా వర్గాల నుంచి అందిన సమాచారం ఆధారంగా పోలీసులు, ఇంటెలిజెన్స్ అధికారులు సంయుక్తంగా చర్యలు చేపట్టారు. ఈ తనిఖీల్లో నిందితుల మొబైల్ ఫోన్లలో ఉగ్రవాద సంబంధిత అంశాలు, అభ్యంతరకర వీడియోలు, పత్రాలు, దేశ వ్యతిరేక ప్రచారానికి సంబంధించిన సమాచారం గుర్తించినట్లు పోలీసులు తెలిపారు. ఈ వ్యవహారంపై సాత్‌గావన్ పోలీస్ స్టేషన్‌లో ఆయుధ చట్టం, చట్టవిరుద్ధ కార్యకలాపాల నిరోధక చట్టం కింద కేసులు నమోదు చేసి దర్యాప్తు కొనసాగిస్తున్నారు.

పోలీసుల ప్రకారం అర్సాద్, ముస్కాన్ సామాజిక మాధ్యమాలను ఉపయోగించి భారత యువతను దేశ వ్యతిరేక భావజాలం వైపు మళ్లించే ప్రయత్నం చేశారని అనుమానిస్తున్నారు. ముఖ్యంగా ఇన్‌స్టాగ్రామ్ ద్వారా కొంతమంది యువతను ప్రభావితం చేసేందుకు ప్రయత్నించినట్లు దర్యాప్తులో వెల్లడైనట్లు తెలిపారు. అలాగే సామాజిక మాధ్యమాల ద్వారా పాకిస్థాన్‌కు చెందిన పలువురు వ్యక్తులతో వీరికి సంబంధాలు ఉన్నట్లు ప్రాథమిక విచారణలో గుర్తించినట్లు పోలీసులు పేర్కొన్నారు.

అర్సాద్ ఇంట్లో నిర్వహించిన సోదాల్లో మొబైల్ ఫోన్, టాబ్లెట్, దేశీయంగా తయారు చేసిన తుపాకీ, బుల్లెట్ ప్రూఫ్ జాకెట్, ట్రైపాడ్ వంటి వస్తువులను స్వాధీనం చేసుకున్నట్లు పోలీసులు వెల్లడించారు. అతని మొబైల్, టాబ్లెట్‌లలో అనేక అనుమానాస్పద ఇన్‌స్టాగ్రామ్ ఖాతాలు ఉన్నట్లు గుర్తించారు. ఆ ఖాతాల్లో రెచ్చగొట్టే ఆడియోలు, వీడియోలు, ఉగ్రవాదానికి మద్దతు ఇచ్చే పోస్టులు ఉన్నాయని పోలీసులు తెలిపారు.

దర్యాప్తులో భాగంగా అర్సాద్ పలు వాట్సాప్ గ్రూపుల్లో చురుకుగా ఉన్నట్లు గుర్తించినట్లు అధికారులు తెలిపారు. ఆ గ్రూపుల్లో పాకిస్థాన్‌కు చెందిన మొబైల్ నంబర్లు కూడా ఉన్నాయని వెల్లడించారు. సమీపంలోని అడవిలో సైనిక శిక్షణ తరహాలో సాధన చేస్తున్నట్లు చూపించే వీడియోలు, ఫొటోలు కూడా అతని మొబైల్ నుంచి లభించినట్లు పోలీసులు పేర్కొన్నారు.

విచారణలో అర్సాద్ తనతో పాటు ముస్కాన్ కూడా ఈ కార్యకలాపాల్లో భాగస్వామిగా ఉందని తెలిపినట్లు పోలీసులు చెప్పారు. ముస్కాన్ వద్ద నుంచి మొబైల్ ఫోన్, వీడియో కెమెరాను స్వాధీనం చేసుకున్నారు. ఆమె ఫోన్‌లో కూడా అభ్యంతరకరమైన వీడియోలు, దేశ వ్యతిరేక కంటెంట్ ఉన్నట్లు గుర్తించినట్లు పోలీసులు తెలిపారు.

ప్రస్తుతం ఈ కేసులో మరింత లోతైన దర్యాప్తు కొనసాగుతోంది. నిందితులకు ఉన్న ఇతర సంబంధాలు, సామాజిక మాధ్యమాల ద్వారా జరిగిన కార్యకలాపాలు, విదేశీ వ్యక్తులతో సంబంధాలపై భద్రతా సంస్థలు ఆరా తీస్తున్నాయి. స్వాధీనం చేసుకున్న డిజిటల్ ఆధారాలను పరిశీలిస్తూ తదుపరి చర్యలు తీసుకునేందుకు అధికారులు సిద్ధమవుతున్నారు.