ఖమేనీ అంత్యక్రియలకు గైర్హాజరైన సుప్రీం లీడర్ మొజ్తబా

ఇరాన్ మాజీ సుప్రీం లీడర్ అయతొల్లా అలీ ఖమేనీ అంత్యక్రియలు దేశవ్యాప్తంగా అత్యంత వైభవంగా కొనసాగుతున్న వేళ, ప్రస్తుత సుప్రీం లీడర్ మొజ్తబా ఖమేనీ గైర్హాజరు కావడం తీవ్ర చర్చకు దారితీసింది. ఆదివారం నిర్వహించిన ప్రధాన అంత్యక్రియల కార్యక్రమానికి వేలాది మంది ప్రజలు, ప్రభుత్వ ఉన్నతాధికారులు, మతపెద్దలు హాజరై అలీ ఖమేనీకి తుది నివాళులు అర్పించారు. అయితే ఆయన వారసుడిగా బాధ్యతలు చేపట్టిన మొజ్తబా ఖమేనీ మాత్రం ఈ కార్యక్రమంలో కనిపించకపోవడం అనేక ఊహాగానాలకు కారణమైంది. అలీ ఖమేనీకి చెందిన మరో ముగ్గురు కుమారులు మసూద్ ఖమేనీ, మోస్తఫా ఖమేనీ, మేయ్‌సమ్ ఖమేనీ అంత్యక్రియలకు హాజరై తండ్రికి నివాళులర్పించారు. అలాగే ఇరాన్ అధ్యక్షుడు మసూద్ పెజెష్కియన్, ఇస్లామిక్ రివల్యూషనరీ గార్డ్స్ ప్రధానాధికారి అహ్మద్ వహీది సహా పలువురు కీలక రాజకీయ, సైనిక, మత నాయకులు కూడా కార్యక్రమంలో పాల్గొన్నారు. ప్రభుత్వ ప్రతినిధులు, విదేశీ అతిథులు, లక్షలాది మంది భక్తులు ఈ కార్యక్రమానికి హాజరయ్యారు. మొజ్తబా ఖమేనీ గైర్హాజరు కావడంపై ఇప్పటికే అనేక ఊహాగానాలు ప్రచారంలో ఉన్నాయి. అలీ ఖమేనీ మరణానికి కారణమైనట్లు పేర్కొంటున్న అమెరికా–ఇజ్రాయెల్ వైమానిక దాడుల్లో మొజ్తబా కూడా గాయపడినట్లు గత కొన్ని రోజులుగా పుకార్లు వినిపిస్తున్నాయి. అధికారికంగా దీనిపై ఎలాంటి ధృవీకరణ లేకపోయినా, ఆయన మార్చి ప్రారంభంలో సుప్రీం లీడర్‌గా నియమితులైన తర్వాత ప్రజల ముందుకు రాకపోవడం ఈ ఊహాగానాలకు మరింత బలం చేకూర్చుతోంది.