నాసిక్‌లో దారుణం.. 15 కి.మీ వెంటాడి కుటుంబంపై దాడి

మహారాష్ట్రలోని నాసిక్ జిల్లాలో షాకింగ్ ఘటన చోటుచేసుకుంది. ప్రకృతి అందాలను ఆస్వాదించేందుకు వెళ్లిన ఓ కుటుంబం భయానక అనుభవాన్ని ఎదుర్కొంది. కుటుంబంలోని ఓ మహిళను కొందరు స్థానిక యువకులు వేధించడంతో ప్రారంభమైన వివాదం చివరకు తీవ్ర హింసకు దారితీసింది. ఆరోపణల ప్రకారం, ఆ కుటుంబాన్ని దాదాపు 15 కిలోమీటర్ల మేర వెంటాడిన దుండగులు ఇనుప రాడ్లతో దాడి చేశారు. ఈ ఘటన రాష్ట్రవ్యాప్తంగా ఆందోళనకు కారణమైంది  పోలీసుల వివరాల ప్రకారం, ఎనిమిది మంది సభ్యులతో కూడిన ఒక కుటుంబం నాసిక్ జిల్లాలోని ఇగత్‌పురి తాలూకాలో ఉన్న భవ్లీ డ్యామ్ ప్రాంతానికి విహారయాత్రకు వెళ్లింది. అక్కడ ప్రకృతి అందాలను ఆస్వాదిస్తున్న సమయంలో కొందరు స్థానిక వ్యక్తులు కుటుంబంలోని ఓ మహిళపై అసభ్యకర వ్యాఖ్యలు చేయడంతో పాటు వేధింపులకు పాల్పడ్డారని ఆరోపణలు ఉన్నాయి. దీనిని కుటుంబ సభ్యులు తీవ్రంగా ప్రశ్నించడంతో ఇరువర్గాల మధ్య వాగ్వాదం జరిగింది.

వాగ్వాదం అనంతరం అక్కడి నుంచి కారులో బయలుదేరిన కుటుంబాన్ని దుండగులు వదిలిపెట్టలేదు. తమ వాహనాలతో వారి కారును వెంబడిస్తూ దాదాపు 15 కిలోమీటర్ల వరకు వెంటాడినట్లు పోలీసులు తెలిపారు. అనంతరం కుటుంబం ప్రయాణిస్తున్న వాహనాన్ని అడ్డగించి, ఇనుప రాడ్లు మరియు ఇతర వస్తువులతో దాడి చేసినట్లు ప్రాథమిక విచారణలో వెల్లడైంది. ఈ దాడిలో కుటుంబ సభ్యులు గాయపడినట్లు సమాచారం.

దాడి అనంతరం బాధితులు పోలీసులను ఆశ్రయించగా కేసు నమోదు చేశారు. ఘటనపై దర్యాప్తు ప్రారంభించిన పోలీసులు దాడికి పాల్పడిన వ్యక్తులను గుర్తించే పనిలో నిమగ్నమయ్యారు. సంఘటనకు సంబంధించిన సీసీటీవీ దృశ్యాలు, ప్రత్యక్ష సాక్షుల వాంగ్మూలాలు, ఇతర ఆధారాలను సేకరిస్తున్నట్లు అధికారులు తెలిపారు. నిందితులపై కఠిన చర్యలు తీసుకుంటామని పోలీసులు హామీ ఇచ్చారు