40 కుటుంబాలకు ఉజ్వల గ్యాస్ కనెక్షన్లు పంపిణీ

వీరులపాడు మండలం జుజ్జూరు గ్రామంలో ప్రధానమంత్రి ఉజ్వల పథకం కింద 40 మంది అర్హులైన లబ్ధిదారులకు గ్యాస్ కనెక్షన్లు, సిలిండర్లను ఆంధ్రప్రదేశ్ ప్రభుత్వ విప్, ఎమ్మెల్యే తంగిరాల సౌమ్య పంపిణీ చేశారు. అధికారులు, ఎన్డీఏ కూటమి నాయకులతో కలిసి నిర్వహించిన ఈ కార్యక్రమంలో లబ్ధిదారులకు గ్యాస్ కనెక్షన్లను అందజేసి ప్రభుత్వం మహిళల సంక్షేమానికి కట్టుబడి ఉందని ఆమె పేర్కొన్నారు.

ఈ సందర్భంగా ఎమ్మెల్యే తంగిరాల సౌమ్య మాట్లాడుతూ మహిళల జీవన ప్రమాణాలను మెరుగుపరచడం, వారి ఆరోగ్యాన్ని కాపాడడం, కుటుంబాలపై ఆర్థిక భారాన్ని తగ్గించడమే ఎన్డీఏ కూటమి ప్రభుత్వ ప్రధాన లక్ష్యమని తెలిపారు. మహిళా సంక్షేమాన్ని కేంద్రబిందువుగా చేసుకుని ఉజ్వల పథకం, ఉచిత బస్సు ప్రయాణం వంటి పథకాలను సమర్థవంతంగా అమలు చేస్తున్నామని చెప్పారు. ఎన్నికల సమయంలో ప్రజలకు ఇచ్చిన హామీలను ఒక్కొక్కటిగా అమలు చేస్తూ ముందుకు సాగుతున్నామని పేర్కొన్నారు.

రాష్ట్ర ఆర్థిక పరిస్థితులు సవాళ్లతో కూడుకున్నప్పటికీ సంక్షేమ కార్యక్రమాల అమలులో ప్రభుత్వం వెనుకడుగు వేయడం లేదని ఆమె స్పష్టం చేశారు. ప్రతి అర్హులైన కుటుంబానికి ప్రభుత్వ పథకాల ప్రయోజనాలు చేరేలా అధికారులు పనిచేయాలని సూచించారు. గ్రామీణ ప్రాంత మహిళలు పొగరహిత వంటగదుల్లో ఆరోగ్యకరమైన జీవనం సాగించేందుకు ఉజ్వల పథకం ఎంతో ఉపయోగపడుతోందని అన్నారు.

గ్యాస్ కనెక్షన్ల వల్ల మహిళల ఆరోగ్య సమస్యలు తగ్గడమే కాకుండా వంటకు పట్టే సమయం, శ్రమ కూడా తగ్గుతుందని ఎమ్మెల్యే వివరించారు. స్వచ్ఛమైన ఇంధనం వినియోగం ద్వారా పర్యావరణ పరిరక్షణకు కూడా ఈ పథకం దోహదపడుతోందని పేర్కొన్నారు. కేంద్ర, రాష్ట్ర ప్రభుత్వాలు సమన్వయంతో ప్రజా సంక్షేమాన్ని మరింత బలోపేతం చేస్తున్నాయని తెలిపారు.

ఈ కార్యక్రమంలో అధికారులు, ప్రాథమిక వ్యవసాయ సహకార పరపతి సంఘం చైర్మన్లు, నీటి సంఘం అధ్యక్షులు, స్థానిక ప్రజాప్రతినిధులు, ఎన్డీఏ కూటమి నాయకులు, కార్యకర్తలు, లబ్ధిదారులు, గ్రామస్తులు పెద్ద సంఖ్యలో పాల్గొన్నారు. ప్రభుత్వం అమలు చేస్తున్న సంక్షేమ పథకాలు అర్హులైన ప్రతి కుటుంబానికి చేరేలా కృషి కొనసాగుతుందని ఈ సందర్భంగా అధికారులు వెల్లడించారు.