గిరిజనుల ప్రత్యేక వంటకం.. చీమ గుడ్ల కూరకు పెరుగుతున్న ఆదరణ

ఉత్తరాంధ్ర గిరిజన ప్రాంతాల్లో ఎంతో ప్రత్యేక గుర్తింపు పొందిన సంప్రదాయ వంటకాలలో చీమ గుడ్ల కూర ఒకటి. వినడానికి ఆశ్చర్యంగా అనిపించినా, ఈ వంటకానికి అక్కడి ప్రజల్లో విశేష ఆదరణ ఉంది. ముఖ్యంగా పార్వతీపురం మన్యం, శ్రీకాకుళం జిల్లాల గిరిజనులు తరతరాలుగా ఈ ఆహారాన్ని తమ జీవనశైలిలో భాగంగా చేసుకున్నారు. రుచితో పాటు పోషక విలువలు కూడా అధికంగా ఉండటంతో దీనిని ప్రత్యేక ఆహారంగా భావిస్తారు.

గిరిజనుల ఆహారపు అలవాట్లు సాధారణ ప్రజలతో పోలిస్తే చాలా భిన్నంగా ఉంటాయి. వారు ఎక్కువగా అడవుల్లో సహజంగా లభించే ఆహార పదార్థాలనే వినియోగిస్తారు. రసాయనాలు, కృత్రిమ పదార్థాలు లేకుండా ప్రకృతి ప్రసాదించిన ఆహారాన్నే తీసుకోవడం వల్ల ఆరోగ్యంగా ఉంటారని స్థానికులు చెబుతుంటారు. ఈ క్రమంలో చీమ గుడ్ల కూర వారికి ముఖ్యమైన వంటకంగా నిలిచింది.

అడవుల్లో కనిపించే ఎర్ర చీమల గూళ్ల నుంచి గుడ్లను సేకరించి ప్రత్యేక పద్ధతిలో వంటలు చేస్తారు. పులుసులు, ఇగురు కూరలు, వేపుడు వంటి అనేక రకాల వంటకాలు తయారుచేస్తారు. వర్షాకాలంలో నాలుగు నెలల పాటు ఈ గుడ్లు ఎక్కువగా లభిస్తాయని గిరిజనులు చెబుతున్నారు.

చెట్లపై ఉండే పుల్లేరు చీమల గూళ్ల నుంచి గుడ్లను జాగ్రత్తగా సేకరించి శుభ్రం చేస్తారు. ఆ తర్వాత వాటిని పెసరపప్పు, నువ్వుల పొడి, స్థానికంగా లభించే దుంపలతో కలిపి వండుతారు. కొందరు కాల్చి తింటే, మరికొందరు కూర రూపంలో తయారు చేసుకుంటారు. ప్రత్యేకమైన రుచి కారణంగా ఈ వంటకం ఎంతో ప్రాచుర్యం పొందింది.

చీమ గుడ్లలో ప్రోటీన్లు అధికంగా ఉంటాయని, శరీరానికి అవసరమైన పోషకాలు అందిస్తాయని స్థానికులు విశ్వసిస్తారు. అందుకే వీటిని తమ ఆరోగ్య రహస్యాల్లో ఒకటిగా భావిస్తుంటారు. ప్రస్తుతం ఈ సంప్రదాయ వంటకం గురించి తెలుసుకునేందుకు ఇతర ప్రాంతాల ప్రజలు కూడా ఆసక్తి చూపుతున్నారు. గిరిజన సంస్కృతి, ఆహార సంప్రదాయాలకు ప్రతీకగా నిలిచిన చీమ గుడ్ల కూర ఇప్పుడు ప్రత్యేక గుర్తింపును సొంతం చేసుకుంటోంది.