ఉదయనిధి స్టాలిన్‌కు స్టేషన్ బెయిల్

తమిళనాడులో రాజకీయ ఉద్రిక్తతలకు దారితీసిన ద్వంద్వార్థ వ్యాఖ్యల కేసులో డీఎంకే నేత, శాసనసభ ప్రతిపక్ష నేత ఉదయనిధి స్టాలిన్‌ను పోలీసులు అరెస్ట్ చేశారు. అయితే విచారణ అనంతరం ఆయనను స్టేషన్ బెయిల్‌పై విడుదల చేసినట్లు పోలీసు వర్గాలు వెల్లడించాయి. తంజావూరు సమీపంలోని సెంగిపట్టి పోలీస్ స్టేషన్‌లో విచారణ పూర్తయిన తర్వాత ఈ పరిణామం చోటుచేసుకుంది.

మంగళవారం ఉదయం చెన్నైలోని తన నివాసం నుంచి ఉదయనిధి స్టాలిన్‌ను పోలీసులు అదుపులోకి తీసుకున్నారు. అనంతరం ఆయనను తంజావూరు జిల్లాలోని సెంగిపట్టి పోలీస్ స్టేషన్‌కు తరలించారు. అక్కడ ఉన్నతాధికారుల సమక్షంలో ఆయనను విచారించినట్లు సమాచారం. దాదాపు గంటపాటు విచారణ కొనసాగిన అనంతరం స్టేషన్ బెయిల్‌పై విడుదల చేశారు.

కావేరీ నదీ జలాల అంశంపై డీఎంకే నిర్వహించిన నిరసన కార్యక్రమంలో ఉదయనిధి స్టాలిన్ చేసినట్లు ఆరోపిస్తున్న అభ్యంతరకర వ్యాఖ్యలపై ఈ కేసు నమోదైంది. తంజావూరుకు చెందిన అధికార తమిళగ వెట్రి కజగం మహిళా విభాగం నాయకురాలు ఇచ్చిన ఫిర్యాదు ఆధారంగా పోలీసులు చర్యలు చేపట్టారు.

ఫిర్యాదుదారు ఆరోపణల ప్రకారం, కావేరీ అంశంపై జరిగిన డీఎంకే నిరసనలో ముఖ్యమంత్రి సి. జోసెఫ్ విజయ్‌పై విమర్శలు చేస్తూ ఉదయనిధి స్టాలిన్ ఓ నటుడిని ఉద్దేశించి అభ్యంతరకరమైన ద్వంద్వార్థ వ్యాఖ్యలు చేశారని పేర్కొన్నారు. ఈ ఆరోపణలపై పోలీసులు కేసు నమోదు చేశారు.

వాస్తవానికి ఉదయనిధిని తంజావూరు సౌత్ పోలీస్ స్టేషన్‌లో విచారించాలని పోలీసులు తొలుత నిర్ణయించారు. అయితే అక్కడికి పెద్ద సంఖ్యలో డీఎంకే కార్యకర్తలు చేరుకోవడంతో విచారణ వేదికను సెంగిపట్టి పోలీస్ స్టేషన్‌కు మార్చినట్లు తెలుస్తోంది.

అయితే సెంగిపట్టి పోలీస్ స్టేషన్‌కు తీసుకెళ్లిన సమయంలో ఉదయనిధి స్టాలిన్ పోలీసు వాహనం నుంచి దిగేందుకు నిరాకరించారు. కేసు నమోదైన సంబంధిత పోలీస్ స్టేషన్‌లోనే విచారణ జరగాలని కోర్టు ఆదేశాలు ఉన్నాయని ఆయన అభ్యంతరం వ్యక్తం చేసినట్లు సమాచారం. దీంతో కొంతసేపు విచారణపై అనిశ్చితి నెలకొంది.

మరోవైపు ఉదయనిధి అరెస్ట్ విషయం తెలియడంతో డీఎంకే కార్యకర్తలు పలు ప్రాంతాల్లో నిరసనలు చేపట్టారు. చెన్నైలోని ఆయన నివాసం వద్ద, డీఎంకే ప్రధాన కార్యాలయం అన్నా అరివాలయం వద్ద పెద్ద సంఖ్యలో పార్టీ కార్యకర్తలు చేరుకున్నారు. తంజావూరు జిల్లాలో కూడా పార్టీ శ్రేణులు ఆందోళనలు నిర్వహించాయి.

చెన్నై నుంచి తంజావూరుకు ఉదయనిధిని తరలిస్తున్న పోలీసు వాహనం వెళ్లే మార్గంలో కూడా డీఎంకే కార్యకర్తలు నిరసనలకు దిగారు. రోడ్లు దిగ్బంధించేందుకు ప్రయత్నించిన పలువురు కార్యకర్తలను పోలీసులు అదుపులోకి తీసుకున్నారు. ప్రభుత్వానికి వ్యతిరేకంగా నినాదాలు చేసినట్లు అధికారులు తెలిపారు.

ఈ వ్యవహారం మద్రాస్ హైకోర్టు దృష్టికి కూడా వెళ్లింది. ఉదయనిధి స్టాలిన్‌ను న్యాయ రిమాండ్‌కు పంపే ఉద్దేశం పోలీసులకు లేదని రాష్ట్ర ప్రభుత్వం కోర్టుకు తెలిపింది. విచారణ పూర్తయిన వెంటనే మంగళవారం రోజే స్టేషన్ బెయిల్‌పై విడుదల చేయాలని హైకోర్టు సూచించింది.

దీంతో రాజకీయంగా తీవ్ర చర్చకు దారితీసిన ఈ వ్యవహారంలో ఉదయనిధికి తాత్కాలిక ఉపశమనం లభించింది. అయితే వ్యాఖ్యల కేసుపై తదుపరి న్యాయపరమైన పరిణామాలు ఎలా ఉంటాయన్నది ఆసక్తికరంగా మారింది.