యోగి పిలుపు.. 35 కోట్ల మొక్కల నాటే మహా ఉద్యమం

పర్యావరణ పరిరక్షణకు మరింత ప్రాధాన్యం ఇవ్వాల్సిన అవసరాన్ని నొక్కి చెబుతూ ఉత్తరప్రదేశ్ ముఖ్యమంత్రి యోగి ఆదిత్యనాథ్ కీలక పిలుపునిచ్చారు. మన ఆరోగ్యాన్ని కాపాడుకోవడానికి ఎంత శ్రద్ధ తీసుకుంటామో, అదే స్థాయిలో భూమాత ఆరోగ్యాన్ని కాపాడేందుకు కూడా కృషి చేయాలని ఆయన పేర్కొన్నారు. పర్యావరణ సమతుల్యతను కాపాడడం ప్రతి పౌరుడి బాధ్యత అని స్పష్టం చేసిన యోగి ఆదిత్యనాథ్, రాష్ట్రవ్యాప్తంగా భారీ స్థాయిలో చేపట్టనున్న 'ఏక్ పేడ్ మా కే నామ్' కార్యక్రమాన్ని ప్రారంభించారు. ఈ కార్యక్రమం ద్వారా ఒకే విడతలో 35 కోట్ల మొక్కలను నాటే లక్ష్యాన్ని ఉత్తరప్రదేశ్ ప్రభుత్వం నిర్దేశించింది.  ఈ సందర్భంగా మాట్లాడుతూ, ప్రపంచవ్యాప్తంగా పెరుగుతున్న వాతావరణ మార్పులు, అటవీ విస్తీర్ణం తగ్గిపోవడం, కాలుష్యం, ఉష్ణోగ్రతల పెరుగుదల వంటి సమస్యలు మానవజాతికి తీవ్రమైన సవాళ్లుగా మారాయని యోగి అన్నారు. ఈ సమస్యలకు శాశ్వత పరిష్కారం ప్రకృతిని సంరక్షించడమేనని ఆయన అభిప్రాయపడ్డారు. చెట్లు పెరగడం ద్వారా గాలి నాణ్యత మెరుగుపడటంతో పాటు భూగర్భ జలాల సంరక్షణ, జీవవైవిధ్య పరిరక్షణ, వాతావరణ సమతుల్యతకు కూడా ఎంతో మేలు జరుగుతుందని వివరించారు.

'ఏక్ పేడ్ మా కే నామ్' అనే కార్యక్రమానికి ప్రత్యేక భావోద్వేగ అనుబంధం ఉందని ముఖ్యమంత్రి తెలిపారు. ప్రతి ఒక్కరూ తమ తల్లి పేరుతో ఒక మొక్కను నాటి, దానిని సంరక్షించాలని ఆయన పిలుపునిచ్చారు. ఒక మొక్కను నాటడం మాత్రమే కాకుండా అది పెద్ద చెట్టుగా ఎదిగే వరకు సంరక్షించడం కూడా అంతే ముఖ్యమని ఆయన పేర్కొన్నారు. ఈ కార్యక్రమం ద్వారా పర్యావరణ పరిరక్షణతో పాటు కుటుంబ విలువలు, ప్రకృతిపట్ల బాధ్యత కూడా పెరుగుతాయని చెప్పారు.

ఉత్తరప్రదేశ్ ప్రభుత్వం గత కొన్ని సంవత్సరాలుగా భారీ స్థాయిలో వృక్షారోపణ కార్యక్రమాలను నిర్వహిస్తోంది. ప్రతి ఏడాది కోట్ల సంఖ్యలో మొక్కలను నాటుతూ రాష్ట్రంలో అటవీ విస్తీర్ణాన్ని పెంచేందుకు చర్యలు చేపడుతోంది. ఈసారి 35 కోట్ల మొక్కల లక్ష్యంతో నిర్వహిస్తున్న కార్యక్రమం దేశంలోనే అతిపెద్ద వృక్షారోపణ ఉద్యమాల్లో ఒకటిగా నిలవనుంది. ప్రభుత్వం మాత్రమే కాకుండా ప్రజలు, విద్యార్థులు, స్వచ్ఛంద సంస్థలు, గ్రామపంచాయతీలు, ప్రభుత్వ శాఖలు, పారిశ్రామిక సంస్థలు కూడా ఈ కార్యక్రమంలో భాగస్వాములు కావాలని పిలుపునిచ్చింది.