క్యూర్‌లో ఇందిరమ్మ ఇళ్లు.. 20 ప్రాంతాల్లో భూముల గుర్తింపు

హైదరాబాద్‌ నగర పరిధిలో పేదలకు గృహ కల్పన లక్ష్యంగా రాష్ట్ర ప్రభుత్వం చేపట్టిన ఇందిరమ్మ ఇళ్ల పథకం వేగంగా ముందుకు సాగుతోంది. ముఖ్యంగా క్యూర్‌ పరిధిలో ఇళ్ల నిర్మాణాన్ని ప్రతిష్ఠాత్మకంగా తీసుకున్న ప్రభుత్వం భూముల ఎంపిక ప్రక్రియను వేగవంతం చేసింది. ముఖ్యమంత్రి రేవంత్‌రెడ్డి ఆదేశాల మేరకు వివాదరహిత ప్రభుత్వ భూములను గుర్తించేందుకు అధికారులు క్షేత్రస్థాయిలో విస్తృతంగా పరిశీలనలు నిర్వహిస్తున్నారు. ఇప్పటికే పలుచోట్ల భూములను ఖరారు చేయగా, మిగిలిన ప్రాంతాలకు సంబంధించిన ప్రతిపాదనలను కూడా తుది దశకు తీసుకువెళ్తున్నారు.

ప్రస్తుతం ఏడు ప్రధాన ప్రాంతాల్లో ఇళ్ల నిర్మాణానికి భూములను ఎంపిక చేసినట్లు అధికారులు వెల్లడించారు. నాంపల్లిలోని కుల్సంపురలో 4.3 ఎకరాల్లో ఎల్‌ఐజీ, ఎంఐజీ విభాగాలకు కలిపి 620 ఇళ్లతో కూడిన టవర్‌ నిర్మించనున్నారు. మల్లేపల్లిలోని నిలోఫర్‌ ఆసుపత్రి సమీపంలోని పోలీసు క్వార్టర్స్‌ స్థలంలో 4.20 ఎకరాల్లో 680 ఫ్లాట్లు నిర్మించనున్నారు. కూకట్‌పల్లిలో హౌసింగ్‌ బోర్డుకు చెందిన ఐదు ఎకరాల స్థలాన్ని గుర్తించారు. రెడ్‌హిల్స్‌లో రెండు ఎకరాల్లో 270 ఫ్లాట్లు, బహదూర్‌పుర నియోజకవర్గంలోని ఫారూఖ్‌నగర్‌లో నాలుగు ఎకరాల్లో 600 ఫ్లాట్లు నిర్మించేందుకు ప్రణాళికలు సిద్ధమవుతున్నాయి.

మలక్‌పేట నియోజకవర్గంలో కూడా భారీ స్థాయిలో నిర్మాణాలు చేపట్టనున్నారు. ఓల్డ్‌ క్వార్టర్స్‌ ఆర్‌అండ్‌బీ ప్రాంతంలోని 9.11 ఎకరాల్లో 1,400 ఫ్లాట్లు, కాలడేరా ప్రాంతంలోని 4.7 ఎకరాల్లో 630 ఫ్లాట్ల నిర్మాణానికి స్థలాలను ఎంపిక చేశారు. ఈ ప్రాంతాల్లో మౌలిక వసతులు, రవాణా సౌకర్యాలు, ప్రజల జీవన అవసరాలను దృష్టిలో ఉంచుకుని ప్రణాళికలు రూపొందిస్తున్నారు.

ఇతర నియోజకవర్గాల్లో కూడా భూముల గుర్తింపు ప్రక్రియ కొనసాగుతోంది. రాజేంద్రనగర్‌ నియోజకవర్గానికి మైలార్‌దేవ్‌పల్లిలో ఐదు ఎకరాలు, లక్ష్మీగూడలో ఒక ఎకరం భూమిని అధికారులు గుర్తించారు. మాల్కాజిగిరి నియోజకవర్గానికి కౌకూరులో వాంబే గృహాల సమీపంలోని భూములను పరిశీలిస్తున్నారు. బండ్లగూడలోని తట్టిఅన్నారం, ఫతుల్‌గూడ ప్రాంతాల్లో గతంలో ప్రభుత్వ ఆధీనంలోకి తీసుకున్న భూములను ఉప్పల్‌, ఎల్బీనగర్‌ నియోజకవర్గాల ఇందిరమ్మ ఇళ్ల కోసం వినియోగించే అవకాశాలు ఉన్నట్లు తెలుస్తోంది.

మేడ్చల్‌ నియోజకవర్గానికి పోచారంలోని ఎల్‌ఐజీ కాలనీలో స్థలం సిద్ధంగా ఉండగా, ఖైరతాబాద్‌ నియోజకవర్గానికి హకీంపేట దర్గా సమీపంలో, అలాగే జూబ్లీహిల్స్‌-యూసుఫ్‌గూడ ప్రాంతాల్లో భూములను గుర్తించినట్లు సమాచారం. ఈ వారం రోజుల్లో అన్ని నియోజకవర్గాలకు సంబంధించిన సమగ్ర నివేదిక సిద్ధం చేసి ప్రభుత్వానికి సమర్పించే అవకాశం ఉందని అధికారులు చెబుతున్నారు.

రాష్ట్ర రెవెన్యూ, గృహ నిర్మాణ శాఖ మంత్రి పొంగులేటి శ్రీనివాసరెడ్డి ప్రకారం క్యూర్‌ పరిధిలో ఇందిరమ్మ ఇళ్లు పది అంతస్తుల భవనాల రూపంలో నిర్మించనున్నారు. ఇందుకు సంబంధించిన నమూనాలు, నిర్మాణ విధానం, సౌకర్యాల వివరాలతో కూడిన ప్రత్యేక బ్రోచర్‌ను జూలై మొదటి వారంలో విడుదల చేయనున్నట్లు తెలిపారు. పేదల జీవనోపాధికి ఆటంకం కలగకుండా ప్రస్తుతం వారు నివసిస్తున్న ప్రాంతాలకు సమీపంలోనే ఇళ్లను నిర్మించాలనే లక్ష్యంతో ప్రభుత్వం ముందుకు సాగుతోంది.

ఈ ఏడాది క్యూర్‌ పరిధిలో లక్ష ఇళ్ల నిర్మాణాన్ని లక్ష్యంగా పెట్టుకున్న ప్రభుత్వం తొలి దశలో ప్రతి నియోజకవర్గానికి 500 చొప్పున ఇళ్ల నిర్మాణాన్ని ప్రారంభించనుంది. క్యూర్‌ పరిధిలో ఉన్న 26 నియోజకవర్గాల్లో ఇప్పటికే 20 చోట్ల భూములను గుర్తించినట్లు మంత్రి వెల్లడించారు. ప్రతి స్థలానికి ప్రత్యేక ప్రణాళికలు, డిజైన్లు, నిర్మాణ నమూనాలను సిద్ధం చేసి ఆధునిక సదుపాయాలతో గృహ సముదాయాలను నిర్మించనున్నారు.

ఈ పథకంలో మరో ముఖ్యాంశం మహిళలకు ఆస్తి హక్కు కల్పించడం. కోట్ల రూపాయల విలువైన భూములపై నిర్మించే ఈ ఇళ్లలో మహిళలకు అన్‌డివైడెడ్‌ షేర్‌ కింద వాటా కల్పించి వారి పేర్లపై రిజిస్ట్రేషన్‌ చేయనున్నట్లు ప్రభుత్వం ప్రకటించింది. దీంతో మహిళల ఆర్థిక భద్రత, కుటుంబ స్థిరత్వానికి మరింత బలం చేకూరుతుందని అధికారులు భావిస్తున్నారు.

అదే సమయంలో హౌసింగ్‌ కార్పొరేషన్‌ ఆధ్వర్యంలో రాష్ట్రవ్యాప్తంగా ఒకే నమూనాలో ఆర్డీవో, తహసీల్దార్‌ కార్యాలయాలకు శాశ్వత భవనాల నిర్మాణం చేపట్టాలని కూడా ప్రభుత్వం నిర్ణయించింది. జిల్లాల కలెక్టర్లతో సమన్వయం చేసుకుని పనులను వేగవంతం చేయాలని, మరమ్మతులు అవసరమైన భవనాలకు ప్రతిపాదనలు సిద్ధం చేయాలని మంత్రి అధికారులను ఆదేశించారు. ఇందిరమ్మ ఇళ్ల పథకం ద్వారా హైదరాబాద్‌లో పేదలకు గృహ భద్రత కల్పించడమే కాకుండా ఆధునిక పట్టణాభివృద్ధికి కూడా ప్రభుత్వం ప్రాధాన్యత ఇస్తోంది.