డమాస్కస్‌ను కుదిపిన బాంబు పేలుడు.. ఆరుగురు మృతి

సిరియా రాజధాని డమాస్కస్‌లోని ఒక రద్దీ కేఫ్‌లో జరిగిన బాంబు పేలుడు దేశాన్ని మరోసారి ఉలిక్కిపడేలా చేసింది. ఈ పేలుడులో కనీసం ఆరుగురు మరణించగా, ఇరవై మందికి పైగా గాయపడినట్లు అధికారులు తెలిపారు. నగరంలోని న్యాయస్థాన సముదాయానికి సమీపంలో ఉన్న కేఫ్‌లో పేలుడు సంభవించడంతో అక్కడ ఒక్కసారిగా భయాందోళనలు నెలకొన్నాయి. భద్రతా బలగాలు వెంటనే సంఘటన స్థలానికి చేరుకుని ప్రాంతాన్ని తమ ఆధీనంలోకి తీసుకుని సహాయక చర్యలు ప్రారంభించాయి ప్రాథమిక దర్యాప్తులో కేఫ్‌లో ముందుగానే అమర్చిన పేలుడు పదార్థం కారణంగానే ఈ ఘటన జరిగినట్లు అధికారులు వెల్లడించారు. పేలుడు తీవ్రతకు కేఫ్‌ పూర్తిగా ధ్వంసమవగా, సమీపంలోని దుకాణాలు, వాహనాలు కూడా దెబ్బతిన్నాయి. క్షతగాత్రులను సమీప ఆసుపత్రులకు తరలించి చికిత్స అందిస్తున్నారు. కొందరి పరిస్థితి విషమంగా ఉండటంతో మృతుల సంఖ్య పెరిగే అవకాశం ఉందని వైద్య వర్గాలు తెలిపాయి.ఈ దాడికి ఇప్పటివరకు ఏ సంస్థ బాధ్యత వహించకపోయినా, ఘటన వెనుక ఉన్నవారిని గుర్తించేందుకు భద్రతా సంస్థలు విస్తృత దర్యాప్తు ప్రారంభించాయి. పేలుడు జరిగిన ప్రాంతంలోని నిఘా దృశ్యాలను పరిశీలిస్తూ, ఆధారాలను సేకరిస్తున్నారు. దేశంలో స్థిరత్వాన్ని దెబ్బతీయాలనే ఉద్దేశంతో ఈ దాడి జరిగి ఉండవచ్చని అధికారులు అనుమానిస్తున్నారు.

ఇటీవలి కాలంలో అంతర్యుద్ధం అనంతరం సాధారణ పరిస్థితులు నెలకొల్పేందుకు సిరియా ప్రభుత్వం ప్రయత్నిస్తున్న వేళ ఈ పేలుడు మరోసారి భద్రతాపరమైన ఆందోళనలను పెంచింది. గత కొంతకాలంగా డమాస్కస్‌లో ఇలాంటి పెద్ద దాడులు అరుదుగా జరుగుతున్నప్పటికీ, ఈ ఘటనతో భద్రతా వ్యవస్థపై మరోసారి ప్రశ్నలు తలెత్తాయి. నగరంలో అదనపు భద్రతా బలగాలను మోహరించి ప్రజలు అప్రమత్తంగా ఉండాలని అధికారులు సూచించారు.