అమెరికా 250వ వేడుకలను ట్రంప్ స్వప్రయోజనాలకు వాడుకున్నారా?

అమెరికా స్వాతంత్ర్య ప్రకటనకు 250 సంవత్సరాలు పూర్తయిన సందర్భంగా నిర్వహించిన జాతీయ వేడుకలను మాజీ అధ్యక్షుడు డొనాల్డ్ ట్రంప్ తన వ్యక్తిగత, రాజకీయ ప్రయోజనాల కోసం వినియోగించుకున్నారని అమెరికా ప్రతినిధుల సభలో డెమోక్రాటిక్ సభ్యులు రూపొందించిన మధ్యంతర నివేదిక తీవ్ర ఆరోపణలు చేసింది. దేశ చరిత్రలో అత్యంత ప్రాముఖ్యత కలిగిన ఈ వేడుకలు రాజకీయాలకు అతీతంగా, అమెరికా ప్రజలందరికీ చెందిన జాతీయ ఉత్సవాలుగా ఉండాల్సి ఉండగా, వాటిని ట్రంప్ అనుకూల ప్రచార వేదికగా మార్చారని నివేదిక పేర్కొంది. ఈ నివేదిక వెలువడిన వెంటనే అమెరికా రాజకీయాల్లో కొత్త చర్చకు తెరలేచింది నివేదిక ప్రకారం, అమెరికా 250వ వార్షికోత్సవ కార్యక్రమాల కోసం కాంగ్రెస్ గతంలో ఏర్పాటు చేసిన ద్విపాక్షిక సంస్థ ‘అమెరికా 250’కు సమాంతరంగా ‘ఫ్రీడమ్ 250’ అనే వ్యవస్థను ప్రోత్సహించి, దానిని ప్రధాన కార్యాచరణ వేదికగా ఉపయోగించారని ఆరోపించారు. ఈ సంస్థ ద్వారా జాతీయ ఉత్సవాలను ట్రంప్ వ్యక్తిగత బ్రాండ్‌కు అనుసంధానం చేసే ప్రయత్నం జరిగిందని, ప్రభుత్వ కార్యక్రమాలు కూడా అదే పేరుతో ప్రచారం చేయబడ్డాయని డెమోక్రాట్లు పేర్కొన్నారు ఈ నివేదికలో అత్యంత వివాదాస్పద అంశంగా నిధుల వినియోగాన్ని ప్రస్తావించారు. అమెరికా 250వ వేడుకల కోసం కేటాయించిన నిధుల్లో కొంత భాగం ట్రంప్‌కు సన్నిహితంగా భావించే సంస్థలు, కాంట్రాక్టర్లు, కార్యక్రమాల నిర్వహణకు మళ్లించబడిందని ఆరోపించారు. ప్రభుత్వ మద్దతుతో నిర్వహించాల్సిన చారిత్రక కార్యక్రమాల స్థానంలో ప్రచారాత్మక ప్రదర్శనలు, ప్రత్యేక ఈవెంట్లు, ట్రంప్‌కు అనుకూలంగా కనిపించే కార్యక్రమాలకు ప్రాధాన్యం ఇచ్చారని నివేదిక పేర్కొంది.