ఇరాన్‌పై అమెరికా వైమానిక దాడులు.. మధ్యప్రాచ్యంలో ఉద్రిక్తత

మధ్యప్రాచ్యంలో ఉద్రిక్తతలు మరింత తీవ్రమయ్యాయి. హోర్ముజ్ జలసంధిలో మూడు చమురు ట్యాంకర్లపై జరిగిన దాడులకు ప్రతిస్పందనగా అమెరికా ఇరాన్‌పై లక్ష్యిత వైమానిక దాడులు నిర్వహించింది. అమెరికా సెంట్రల్ కమాండ్ (CENTCOM) ప్రకారం, ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ (IRGC) వినియోగిస్తున్న చిన్న సైనిక పడవలు, అలాగే మరికొన్ని సైనిక లక్ష్యాలపై "శక్తివంతమైన దాడులు" చేపట్టినట్లు వెల్లడించింది. ఈ దాడుల అనంతరం ఇరాన్‌లోని కీలక నౌకాశ్రయ నగరం బందర్ అబ్బాస్ ప్రాంతంలో భారీ అగ్నిప్రమాదం సంభవించిన దృశ్యాలు సామాజిక మాధ్యమాల్లో వైరల్ అయ్యాయి. అమెరికా ప్రకారం, హోర్ముజ్ జలసంధిలో వాణిజ్య నౌకలపై జరిగిన దాడులు అంతర్జాతీయ సముద్ర రవాణా భద్రతకు ముప్పుగా మారాయని పేర్కొంది. ప్రపంచ చమురు సరఫరాలో అత్యంత కీలక మార్గంగా భావించే ఈ జలసంధిలో భద్రతను కాపాడేందుకు తాము చర్యలు తీసుకున్నామని అమెరికా అధికారులు తెలిపారు. ప్రపంచ ఇంధన సరఫరాలో హోర్ముజ్ జలసంధికి అత్యంత కీలక ప్రాధాన్యం ఉండటంతో అక్కడి భద్రతపై అంతర్జాతీయ సమాజం ఆందోళన వ్యక్తం చేస్తోంది.

ఇరాన్ ప్రభుత్వ మీడియా కథనాల ప్రకారం, అమెరికా దాడులు ఖేశ్మ్ ద్వీపం (Qeshm Island), బందర్ అబ్బాస్, సిరిక్ ప్రాంతాలను లక్ష్యంగా చేసుకున్నాయి. ఈ దాడుల వల్ల కొన్ని సైనిక, మౌలిక వసతులకు నష్టం జరిగినట్లు ఇరాన్ మీడియా పేర్కొంది. అయితే ప్రాణనష్టం, నష్టం వివరాలపై పూర్తి అధికారిక సమాచారం ఇంకా వెలువడలేదు.

ఈ పరిణామంపై స్పందించిన ఇరాన్ ఉప విదేశాంగ మంత్రి అమెరికా చర్యలను తీవ్రంగా ఖండించారు. గత నెల ఇరు దేశాల మధ్య కుదిరిన అవగాహన ఒప్పందాన్ని (Memorandum) అమెరికా ఉల్లంఘించిందని ఆరోపించారు. ఈ దాడులు అంతర్జాతీయ చట్టాలకు విరుద్ధమని పేర్కొంటూ, దీనికి తగిన సమయంలో "నిర్ణయాత్మక చర్యలు" తీసుకుంటామని హెచ్చరించారు. అయితే ఆ చర్యల స్వరూపంపై ఎలాంటి వివరాలు వెల్లడించలేదు