మేసాక్ తుఫాన్ బీభత్సం.. చైనాలో వరదలు, సుడిగాలుల విధ్వంసం

మేసాక్ (Maysak) తుఫాన్ చైనాలో తీవ్ర విధ్వంసం సృష్టించింది. దక్షిణ చైనాలోని గ్వాంగ్సీ (Guangxi) ప్రావిన్స్‌ను తుఫాన్ అతలాకుతలం చేయగా, భారీ వర్షాల కారణంగా సంభవించిన ఆకస్మిక వరదలు వేలాది కుటుంబాలను నిరాశ్రయులను చేశాయి. అదే సమయంలో వందల కిలోమీటర్ల దూరంలో ఉన్న హుబే (Hubei) ప్రావిన్స్‌లో భారీ ఉరుములు, మెరుపులతో కూడిన తుఫానులు, అరుదుగా కనిపించే సుడిగాలులు (టోర్నడోలు) కూడా సంభవించాయి. ఈ విపత్తుల కారణంగా ఇప్పటివరకు కనీసం 17 మంది ప్రాణాలు కోల్పోగా, వందలాది మంది గాయపడ్డారు. పదివేల మందికి పైగా ప్రజలను సురక్షిత ప్రాంతాలకు తరలించినట్లు ప్రభుత్వ మీడియా వెల్లడించింది.

గ్వాంగ్సీలోని రెన్‌హె గ్రామం ప్రజలకు భారీ వర్షాలు కొత్త విషయం కాదు. అయితే ఈసారి పరిస్థితి పూర్తిగా భిన్నంగా మారింది. ఆదివారం ప్రారంభమైన వర్షం ఎలాంటి విరామం లేకుండా కురవడంతో గ్రామంలోని నదులు, కాలువలు ఉప్పొంగాయి. అర్ధరాత్రి దాటే సరికి నీరు మోకాళ్ల వరకు చేరగా, తెల్లవారేసరికి ఇళ్ల మొదటి అంతస్తు మొత్తం నీట మునిగిపోయింది. గ్రామస్థులు ప్రాణాలు దక్కించుకోవడానికి హడావుడిగా ఇళ్లను ఖాళీ చేయాల్సి వచ్చింది.

స్థానిక నివాసి జౌ తెలిపిన వివరాల ప్రకారం, వరద నీరు అత్యంత వేగంగా రావడంతో ప్రజలకు ఇంటి నుంచి ఆహారం, అవసరమైన వస్తువులు కూడా తీసుకెళ్లే అవకాశం లభించలేదు. కొద్ది నిమిషాల్లోనే పరిస్థితి పూర్తిగా మారిపోవడంతో చాలా మంది ఎలాంటి సన్నాహాలు లేకుండానే ఎత్తైన ప్రాంతాలకు పరుగులు తీశారు. అనేక కుటుంబాలు తమ ఆస్తులు, పశువులను కూడా కోల్పోయాయి.