విద్యారంగంలో చారిత్రాత్మక సంస్కరణలకు కూటమి ప్రభుత్వం శ్రీకారం

విజయవాడ సెంట్రల్‌ నియోజకవర్గంలోని తన కార్యాలయంలో ప్రభుత్వ విప్‌, ఎమ్మెల్యే బొండా ఉమామహేశ్వరరావు విలేకరుల సమావేశం నిర్వహించారు. ఈ సందర్భంగా రాష్ట్రంలో కూటమి ప్రభుత్వం విద్యారంగాన్ని బలోపేతం చేసేందుకు చేపడుతున్న సంస్కరణలను వివరించారు. ప్రభుత్వ పాఠశాలల్లో ఉపాధ్యాయుల కొరతను తీర్చడం, విద్యార్థులకు నాణ్యమైన విద్య అందించడం, పాఠశాలల్లో మౌలిక వసతులను మెరుగుపరచడం వంటి అంశాలకు ప్రభుత్వం అత్యధిక ప్రాధాన్యం ఇస్తోందని తెలిపారు.

కూటమి ప్రభుత్వం అధికారంలోకి వచ్చిన తర్వాత మెగా డీఎస్సీ–2025 నియామక ప్రక్రియను పారదర్శకంగా, వేగంగా పూర్తి చేసిందని బొండా ఉమామహేశ్వరరావు చెప్పారు. మొత్తం 16,347 ఉపాధ్యాయ పోస్టులను భర్తీ చేసేందుకు చర్యలు చేపట్టగా, ఇప్పటివరకు 15,941 పోస్టులకు నియామక ప్రక్రియను పూర్తి చేసినట్లు వివరించారు. భారీ సంఖ్యలో ఉపాధ్యాయ పోస్టుల భర్తీతో ప్రభుత్వ పాఠశాలల్లో ఉపాధ్యాయుల కొరత తగ్గడంతో పాటు విద్యా ప్రమాణాలు మరింత మెరుగుపడతాయని పేర్కొన్నారు.

మెగా డీఎస్సీ–2025కు దాదాపు 3.36 లక్షల మంది అభ్యర్థులు పరీక్షలకు దరఖాస్తు చేసుకోగా, మొత్తం 5.77 లక్షల దరఖాస్తులు నమోదయ్యాయని బొండా ఉమా తెలిపారు. రాష్ట్రవ్యాప్తంగా కంప్యూటర్‌ ఆధారిత పరీక్షలను పారదర్శకంగా నిర్వహించి, ఎలాంటి అవకతవకలకు అవకాశం లేకుండా నియామక ప్రక్రియను పూర్తి చేశామని చెప్పారు. అభ్యర్థులకు న్యాయం జరిగేలా ప్రతి దశలో నిబంధనలను కచ్చితంగా పాటించినట్లు వివరించారు.

గత వైఎస్సార్‌ కాంగ్రెస్‌ పార్టీ ప్రభుత్వ హయాంలో విద్యారంగాన్ని నిర్లక్ష్యం చేయడం వల్ల ఉపాధ్యాయ పోస్టుల భర్తీ ఆలస్యమైందని బొండా ఉమా విమర్శించారు. కూటమి ప్రభుత్వం అధికారంలోకి వచ్చిన వెంటనే విద్యారంగానికి అత్యధిక ప్రాధాన్యం ఇచ్చిందని తెలిపారు. ఉపాధ్యాయ నియామకాలకు అవసరమైన ఉపాధ్యాయ అర్హత పరీక్ష నిర్వహణ, డీఎస్సీ ప్రకటన, రిజర్వేషన్ల అమలు, ప్రతిభ ఆధారంగా ఎంపిక వంటి ప్రక్రియలను నిబంధనల ప్రకారం పూర్తి చేశామని చెప్పారు.

ఉపాధ్యాయ నియామకాల్లో ప్రతిభతో పాటు రోస్టర్‌ విధానాన్ని అమలు చేశామని ఎమ్మెల్యే తెలిపారు. ఎస్సీ, ఎస్టీ, బీసీ, మైనారిటీలు, మహిళలు, దివ్యాంగులకు న్యాయం జరిగేలా చర్యలు తీసుకున్నామని పేర్కొన్నారు. క్రీడాకారులకు ప్రత్యేక రిజర్వేషన్‌, దివ్యాంగులకు కేటాయింపులు వంటి అంశాలకు కూడా ప్రాధాన్యం ఇచ్చామని వివరించారు. నియామక ప్రక్రియలో అన్ని వర్గాల హక్కులను పరిరక్షిస్తూ పారదర్శకంగా ముందుకు సాగామని తెలిపారు.

ప్రభుత్వ పాఠశాలల్లో మౌలిక వసతుల అభివృద్ధి, విద్యార్థులకు మెరుగైన విద్య, ఉపాధ్యాయుల నియామకాలు, సాంకేతిక పరిజ్ఞానం వినియోగం వంటి అంశాలపై కూటమి ప్రభుత్వం ప్రత్యేక దృష్టి సారించిందని బొండా ఉమామహేశ్వరరావు చెప్పారు. విద్యార్థులకు మెరుగైన అభ్యసన వాతావరణం కల్పించడంతో పాటు వారి భవిష్యత్తును బంగారు భవిష్యత్తుగా తీర్చిదిద్దేందుకు ప్రభుత్వం నిరంతరం కృషి చేస్తోందని తెలిపారు.

ప్రతి సంవత్సరం మెగా డీఎస్సీ నిర్వహిస్తామని ప్రభుత్వం ప్రకటించిందని, ఈ ఏడాది కూడా మూడు వేల ఉపాధ్యాయ పోస్టులను భర్తీ చేయనున్నామని బొండా ఉమా వెల్లడించారు. దీని ద్వారా ఉపాధ్యాయ ఉద్యోగాల కోసం ఎదురుచూస్తున్న యువతకు నిరంతరం అవకాశాలు లభిస్తాయని చెప్పారు. యువతకు ఉద్యోగాలు, విద్యార్థులకు నాణ్యమైన విద్య అనే లక్ష్యంతో ప్రభుత్వం ముందుకు సాగుతోందని పేర్కొన్నారు.

రాబోయే రోజుల్లో విద్యారంగంలో మరిన్ని సంస్కరణలు చేపట్టడంతో పాటు ఉపాధ్యాయ నియామకాలు, పాఠశాలల అభివృద్ధి కార్యక్రమాలను మరింత వేగవంతం చేస్తామని బొండా ఉమామహేశ్వరరావు తెలిపారు. రాష్ట్రాన్ని విద్యారంగంలో దేశంలోనే అగ్రగామిగా నిలిపేందుకు రాష్ట్ర ఐటీ, విద్యాశాఖ మంత్రి నారా లోకేష్‌ కృషి చేస్తున్నారని పేర్కొన్నారు. ప్రభుత్వ చర్యలతో పాఠశాలల్లో విద్యా ప్రమాణాలు మెరుగుపడి, విద్యార్థులకు మెరుగైన భవిష్యత్తు అందుతుందని ఆయన ఆశాభావం వ్యక్తం చేశారు.