మోదీతో ఎంపీ లావు భేటీ..

న్యూఢిల్లీలో ప్రధానమంత్రి నరేంద్ర మోదీతో పల్నాడు ఎంపీ లావు శ్రీకృష్ణదేవరాయలు మర్యాదపూర్వకంగా భేటీ అయ్యారు. పల్నాడు జిల్లాలో నిర్వహించిన క్రెడిట్ అవుట్‌రీచ్ కార్యక్రమం విజయవంతమైన వివరాలతో కూడిన నివేదికను ప్రధానమంత్రికి అందజేశారు. ఈ సందర్భంగా జిల్లాలో వివిధ వర్గాలకు అందించిన ఆర్థిక సహాయం, రుణాల వివరాలను ప్రధాని మోదీకి వివరించారు.

పల్నాడులో నిర్వహించిన క్రెడిట్ అవుట్‌రీచ్ ప్రోగ్రామ్ ద్వారా 1,03,246 మంది లబ్ధిదారులకు రూ.3,216 కోట్ల మేర రుణాలు అందించినట్లు ఎంపీ లావు శ్రీకృష్ణదేవరాయలు తెలిపారు. ఈ కార్యక్రమం ద్వారా రైతులు, మహిళలు, యువత, చిన్న వ్యాపారులు, చేతివృత్తిదారులు, స్వయం సహాయక సంఘాలకు ఆర్థికంగా అండగా నిలిచినట్లు వివరించారు.

ప్రధానంగా 83,365 మంది రైతులకు రూ.2,286 కోట్ల వ్యవసాయ రుణాలు మంజూరు చేసినట్లు ఎంపీ వెల్లడించారు. రైతుల వ్యవసాయ అవసరాలు, పెట్టుబడులు, పంటల అభివృద్ధికి ఈ రుణాలు ఎంతో ఉపయోగపడుతున్నాయని తెలిపారు. గ్రామీణ ప్రాంతాల్లో వ్యవసాయ రంగాన్ని బలోపేతం చేసేందుకు ఈ కార్యక్రమం కీలకంగా నిలిచిందని పేర్కొన్నారు.

మహిళా సంఘాలు, యువత, సూక్ష్మ, చిన్న, మధ్య తరహా పరిశ్రమలు, చేతివృత్తులపై ఆధారపడిన కుటుంబాలకు కూడా విస్తృతంగా ఆర్థిక సహాయం అందించినట్లు ఎంపీ వివరించారు. రుణ సదుపాయాల ద్వారా స్వయం ఉపాధి అవకాశాలు పెరగడంతో పాటు గ్రామీణ ఆర్థిక వ్యవస్థకు ఊతం లభిస్తుందని తెలిపారు.

పల్నాడు ప్రాంతంలో అమలు చేసిన క్రెడిట్ అవుట్‌రీచ్ కార్యక్రమాన్ని గ్రామీణ ఆర్థికాభివృద్ధికి ఒక నమూనాగా ఎంపీ ప్రధానమంత్రి దృష్టికి తీసుకెళ్లారు. వివిధ ప్రభుత్వ, బ్యాంకింగ్ సంస్థల సమన్వయంతో ఈ కార్యక్రమాన్ని విజయవంతంగా నిర్వహించినట్లు వివరించారు.

ఈ సందర్భంగా పల్నాడు గ్రామీణ ఆర్థికాభివృద్ధి నమూనాను ప్రధాని నరేంద్ర మోదీ అభినందించినట్లు ఎంపీ లావు శ్రీకృష్ణదేవరాయలు తెలిపారు. వికసిత్ భారత్ లక్ష్య సాధనలో గ్రామీణ ప్రాంతాల అభివృద్ధి కీలకమని, ఈ దిశగా కేంద్ర ప్రభుత్వం సంపూర్ణ సహకారం అందిస్తుందని ప్రధాని హామీ ఇచ్చినట్లు వెల్లడించారు.

గ్రామీణ ప్రాంతాల్లో ఆర్థిక అవకాశాలను పెంచడం, ప్రజలకు సులభంగా రుణ సదుపాయాలు అందించడం ద్వారా అభివృద్ధి వేగవంతం అవుతుందని ఎంపీ పేర్కొన్నారు. పల్నాడులో చేపట్టిన కార్యక్రమాలు భవిష్యత్తులో మరిన్ని అభివృద్ధి కార్యక్రమాలకు మార్గదర్శకంగా నిలుస్తాయని తెలిపారు.