ఆరుగురు పతివ్రతలు' రీ రిలీజ్.. ఇప్పుడు హీరోయిన్ అమృత ఎక్కడుంది?

తెలుగు చిత్ర పరిశ్రమలో గత కొంతకాలంగా రీ రిలీజ్ ట్రెండ్ జోరుగా కొనసాగుతోంది. ఒకప్పుడు థియేటర్లలో సందడి చేసిన సినిమాలు ఇప్పుడు కొత్త టెక్నాలజీతో మరోసారి ప్రేక్షకుల ముందుకు వస్తున్నాయి. స్టార్ హీరోల చిత్రాలే కాదు, కల్ట్ ఫాలోయింగ్ సంపాదించుకున్న సినిమాలు కూడా మళ్లీ విడుదలై మంచి ఆదరణ పొందుతున్నాయి. ఇప్పుడు ఆ జాబితాలో చేరేందుకు సిద్ధమవుతోందని ప్రచారం జరుగుతున్న చిత్రం 'ఆరుగురు పతివ్రతలు'.

దర్శకుడు ఈవీవీ సత్యనారాయణ తెరకెక్కించిన ఈ సినిమా అప్పట్లో విడుదలై మంచి చర్చకు దారి తీసింది. ఫ్యామిలీ, కామెడీ చిత్రాలతో పేరు తెచ్చుకున్న ఈవీవీ.. పూర్తిగా భిన్నమైన కథతో ఈ సినిమాను తెరకెక్కించడం అప్పట్లో అందరినీ ఆశ్చర్యపరిచింది. బోల్డ్ కథాంశంతో రూపొందిన ఈ చిత్రం విడుదల సమయంలో వివాదాలకు కూడా కేంద్రంగా నిలిచింది. అయినప్పటికీ ప్రేక్షకుల్లో ప్రత్యేక గుర్తింపును సంపాదించుకుంది.

2004లో విడుదలైన ఈ సినిమాలో చలపతిరావు, ఎల్.బి. శ్రీరామ్, శ్రీకృష్ణ కౌశిక్ కీలక పాత్రల్లో నటించారు. దాదాపు 40 మందికి పైగా కొత్త నటీనటులను ఈ సినిమా ద్వారా పరిచయం చేశారు. కమలాకర్ అందించిన సంగీతం కూడా అప్పట్లో మంచి గుర్తింపు తెచ్చుకుంది.

ఇప్పుడు ఈ సినిమాను 4కే క్వాలిటీతో రీ రిలీజ్ చేయడానికి సన్నాహాలు జరుగుతున్నాయని సోషల్ మీడియాలో ప్రచారం జరుగుతోంది. విజువల్ క్వాలిటీతో పాటు ఆడియోను కూడా కొత్తగా అప్‌గ్రేడ్ చేస్తున్నట్లు టాక్ వినిపిస్తోంది. అధికారిక ప్రకటన ఇంకా రాకపోయినా, ఈ వార్తతో సినిమా అభిమానుల్లో ఆసక్తి పెరిగింది.

ఇప్పటికే సోషల్ మీడియాలో ఈ సినిమాకు సంబంధించిన సన్నివేశాలు తరచూ వైరల్ అవుతుంటాయి. మీమ్ పేజీల్లో కూడా ఈ చిత్రంలోని డైలాగులు, సీన్లు ఎక్కువగా కనిపిస్తుంటాయి. అందుకే ఈ సినిమాను మళ్లీ థియేటర్లలో చూడాలని చాలామంది నెటిజన్లు కోరుతున్నారు.

ఈ వార్తలతో పాటు సినిమాలో హీరోయిన్‌గా నటించిన అమృత గురించి కూడా ఇప్పుడు సోషల్ మీడియాలో చర్చ మొదలైంది. 'ఆరుగురు పతివ్రతలు' సినిమాతో తెలుగు ప్రేక్షకులకు పరిచయమైన ఈ కన్నడ నటి.. తొలి సినిమాతోనే మంచి గుర్తింపు సంపాదించుకున్నారు.

ఈ సినిమా తర్వాత తెలుగులో కొన్ని చిత్రాల్లో మాత్రమే నటించిన అమృత.. పెద్దగా అవకాశాలు దక్కకపోవడంతో క్రమంగా ఇండస్ట్రీకి దూరమయ్యారు. చివరిసారిగా 2009లో విడుదలైన 'జోడి నెంబర్ 1' సినిమాలో కనిపించారు. ఆ తర్వాత ఆమె సినిమాలకు పూర్తిగా గుడ్‌బై చెప్పారు.

ప్రస్తుతం అమృత సోషల్ మీడియాలో కూడా పెద్దగా యాక్టివ్‌గా ఉండరు. అందువల్ల ఆమె తాజా ఫొటోలు లేదా వ్యక్తిగత జీవితానికి సంబంధించిన సమాచారం చాలా అరుదుగా మాత్రమే బయటకు వస్తుంటుంది. దీంతో ఆమె ఇప్పుడు ఎలా ఉన్నారు? ఏం చేస్తున్నారు? అనే ఆసక్తి అభిమానుల్లో కనిపిస్తోంది.

రీ రిలీజ్ ట్రెండ్ కొనసాగుతున్న ఈ సమయంలో 'ఆరుగురు పతివ్రతలు' మరోసారి ప్రేక్షకుల ముందుకు వస్తే కొత్త తరం ప్రేక్షకులు కూడా ఈ సినిమాను థియేటర్లలో చూసే అవకాశం ఉంటుంది. ఒకప్పుడు సంచలనం సృష్టించిన ఈ చిత్రం మళ్లీ అదే స్థాయిలో ఆదరణ పొందుతుందా లేదా అనేది చూడాలి. ప్రస్తుతం మాత్రం ఈ సినిమా రీ రిలీజ్ వార్తతో పాటు హీరోయిన్ అమృత పేరు కూడా సోషల్ మీడియాలో మరోసారి వైరల్‌గా మారింది.