ఉల్లి రైతులకు కేంద్రం ఊరట..

ఉల్లి రైతులకు కేంద్ర ప్రభుత్వం ఊరట కలిగించే నిర్ణయం తీసుకుంది. ఉల్లి కొనుగోలు ధరను 13 శాతం పెంచుతూ బఫర్ స్టాక్ కోసం కొత్త ధరలను ఖరారు చేసింది. తాజా నిర్ణయంతో క్వింటాల్ ఉల్లి కొనుగోలు ధర రూ.2,125కు చేరింది. గతంలో ఈ ధర రూ.1,875గా ఉండగా, తాజా పెంపుతో రైతులకు మెరుగైన ఆదాయం లభించనుందని అధికారులు తెలిపారు.

ఈ సీజన్‌లో ఉల్లి మద్దతు ధరను కేంద్ర ప్రభుత్వం ఇప్పటికే ఐదుసార్లు పెంచింది. మార్కెట్‌లో ధరల స్థిరత్వం కల్పించడంతో పాటు రైతుల ప్రయోజనాలను కాపాడేందుకు ఈ నిర్ణయం తీసుకున్నట్లు తెలుస్తోంది. బఫర్ స్టాక్ కోసం ఉల్లి సేకరణను వేగవంతం చేయాలని సంబంధిత సంస్థలకు ఆదేశాలు జారీ చేసినట్లు సమాచారం.

దేశవ్యాప్తంగా ఉల్లి ఉత్పత్తి, సరఫరా పరిస్థితులను దృష్టిలో ఉంచుకుని ఈ చర్యలు చేపట్టినట్లు కేంద్రం తెలిపింది. రైతుల నష్టాలను తగ్గించడంతో పాటు వినియోగదారులకు కూడా ధరల స్థిరత్వం కల్పించడమే లక్ష్యమని అధికారులు పేర్కొన్నారు.