హేమంత్‌ పై పోలీసుల కాల్పుల ఘటనపై హైకోర్టులో పిల్ దాఖలు

అమరావతి: రాప్తాడు ఘటనలో నిందితుడు హేమంత్‌పై పోలీసులు కాల్పులు జరిపిన వ్యవహారం ఆంధ్రప్రదేశ్ హైకోర్టుకు చేరింది. ఈ ఘటనపై స్వతంత్ర దర్యాప్తునకు ఆదేశాలు ఇవ్వాలని కోరుతూ హైకోర్టులో ప్రజాప్రయోజన వ్యాజ్యం (పిల్‌) దాఖలైంది. ఈ పిటిషన్‌ను రేపు విచారించనున్నట్లు హైకోర్టు తెలిపింది.

కాల్పుల ఘటనకు సంబంధించిన వీడియో ఫుటేజ్, సీసీటీవీ రికార్డులు, వైద్య నివేదికలు, ఫోరెన్సిక్ ఆధారాలను భద్రపరిచేలా ఆదేశాలు ఇవ్వాలని పిటిషనర్ కోరారు. అలాగే హేమంత్ వాంగ్మూలాన్ని మేజిస్ట్రేట్ ముందు నమోదు చేయించాలని విజ్ఞప్తి చేశారు.

ఈ పిటిషన్‌లో ఆంధ్రప్రదేశ్ ప్రభుత్వం, రాష్ట్ర డీజీపీ, జిల్లా కలెక్టర్‌తో పాటు మరో తొమ్మిది మందిని ప్రతివాదులుగా పేర్కొన్నారు. ఘటనపై నిష్పక్షపాతంగా విచారణ జరిపి, సంబంధిత ఆధారాలు చెదిరిపోకుండా చర్యలు తీసుకోవాలని పిటిషనర్ తన పిటిషన్‌లో కోరారు.