అంగన్వాడీ అభివృద్ధికి ప్రత్యేక దృష్టి: ఎన్. రాఘవేంద్ర రెడ్డి

స్వర్ణాంధ్ర – స్వచ్ఛ ఆంధ్ర లక్ష్యాల సాధనలో భాగంగా అంగన్వాడీ కేంద్రాల అభివృద్ధికి ప్రత్యేక ప్రాధాన్యం ఇస్తున్నామని మంత్రాలయం తెలుగుదేశం పార్టీ ఇంచార్జి ఎన్. రాఘవేంద్ర రెడ్డి తెలిపారు. మంత్రాలయం పట్టణంలోని రాఘవేంద్ర నగర్ అంగన్వాడీ కేంద్రాన్ని జనసేన ఇంచార్జి లక్ష్మన్నతో కలిసి సందర్శించిన ఆయన అక్కడి వసతులు, చిన్నారులకు అందుతున్న సేవలు, పరిశుభ్రత, పోషకాహార కార్యక్రమాల అమలు తీరును పరిశీలించారు.

అంగన్వాడీ కేంద్రంలో చిన్నారులకు అందిస్తున్న ఆహారం, విద్యా కార్యకలాపాలు, ఆరోగ్య పరిరక్షణ చర్యలపై వివరాలు తెలుసుకున్నారు. అనంతరం చిన్నారులతో ఆప్యాయంగా ముచ్చటిస్తూ వారి ఆరోగ్యం, చదువు, అభివృద్ధిపై ఆరా తీశారు. చిన్నారులతో కలిసి భోజనం చేసి, వారికి అందిస్తున్న ఆహార నాణ్యతను ప్రత్యక్షంగా పరిశీలించారు.

ఈ సందర్భంగా ఎన్. రాఘవేంద్ర రెడ్డి మాట్లాడుతూ చిన్నారుల ఆరోగ్యం, విద్య, పోషకాహారం ప్రతి కుటుంబ భవిష్యత్తుకు బలమైన పునాదిగా నిలుస్తాయని అన్నారు. అంగన్వాడీ కేంద్రాలు గ్రామీణ ప్రాంతాల్లో చిన్నారులు, గర్భిణీలు, బాలింతలకు కీలక సేవలు అందిస్తున్నాయని పేర్కొన్నారు. ఈ కేంద్రాలు మరింత మెరుగైన సేవలు అందించేలా అవసరమైన సహకారం అందించేందుకు కృషి చేస్తామని హామీ ఇచ్చారు.

ప్రభుత్వ సేవలు ప్రజలకు సమర్థవంతంగా చేరాలంటే గ్రామాల్లోని ప్రభుత్వ సంస్థల పనితీరును నిరంతరం పర్యవేక్షించడం అవసరమని అన్నారు. ప్రజా సమస్యలను గుర్తించి వాటి పరిష్కారానికి చర్యలు తీసుకోవడం తమ బాధ్యతగా భావిస్తున్నామని తెలిపారు. స్వర్ణాంధ్ర – స్వచ్ఛ ఆంధ్ర కార్యక్రమం ద్వారా పరిశుభ్రతతో పాటు ఆరోగ్యకరమైన సమాజ నిర్మాణం సాధ్యమవుతుందని పేర్కొన్నారు.

ఈ కార్యక్రమంలో ఎంపీడీవో, సీడీపీవో, అశోక్ రెడ్డి, ఎంపీటీసీ వెంకటేష్, టౌన్ అధ్యక్షుడు వరదరాజులు, పవన్, మల్లి, శివ, రఘు, ఆచారి, నరసింహ తదితర కూటమి నాయకులు, కార్యకర్తలు పాల్గొన్నారు. అంగన్వాడీ కేంద్రాల బలోపేతం ద్వారా చిన్నారుల సమగ్ర అభివృద్ధికి ప్రభుత్వం కట్టుబడి ఉందని నాయకులు తెలిపారు.